«Իրական Մակկոյ», «Կողոպտողը», «Գողը», «Օուշենի ընկերները», «Կողոպուտ իտալական ձևով»… Տասնյակ ֆիլմեր կարելի է հիշել, որոնցում ցուցադրված մտացածին կողոպուտների մասին պատկերացումները գերված են մեզ պահել էկրաններին, իսկ շատերը երազել են հոլիվուդյան սցենարներն իրականություն դարձնելու մասին: Լոնդոնում էլ գտնվել են խելոքներ, ովքեր երազելուց զատ կոնկրետ քայլերի են գնացել ու հաջողության հասել:
6 անհայտ անձինք խիստ յուրահատուկ ձևով թալանել են Լոնդոնի կենտրոնում գտնվող դեպոզիտային բանկը` դատարկելով այնտեղ պահվող պահարանները: Տարբեր հաշվարկներով՝ գողոնի ընդհանուր արժեքը տատանվում է մի քանի տասնյակից մինչև մի քանի հարյուր միլիոն ֆունտի սահմաններում, իսկ եթե հաշվի առնենք, որ Լոնդոնն ամենաշատ տեսախցիկներով քաղաքն է, այս իրական կողոպուտը փաստորեն ավելի բարդ է, քան ֆիլմերինը:
Նախ՝ չարագործները պահեստում եղել են երկու անգամ` ուրբաթ գիշերը, իսկ այնուհետև կիրակի գիշերը: Երկրորդը՝ նրանք այդպես էլ անհայտ են մնացել, թեև տեսախցիկները ֆիքսել են նրանց, ինչպես նաև նրանց մեքենան: Մամուլը նույնիսկ մականուններով է կնքել նրանց. Խարտյաշ, Ուժեղ, Ծերուկ, միստր Մոնտանա, Ջենթլմեն և Աշտարակ: Ու վերջապես, ոստիկանությունը կողոպուտի մասին իմացել է միայն օրեր անց (առաջին ներխուժումը տեղի է ունեցել ապրիլի 3-ին, երկրորդը` 5-ին, իսկ ոստիկանությունն ահազանգ է ստացել միայն ապրիլի 7-ին):
Իսկ հիմա ամենահետաքրքիրը. դեռ ապրիլի 3-ի գիշերվա 00:21-ին ոստիկանությունն ահազանգ է ստացել բանկի շենքից, ինչը պետք է հուշեր ապօրինի ներխուժման մասին, սակայն համակարգչային համակարգը, որն ավտոմատացված ռեժիմով որոշում է եկող ազդանշանների առաջնահերթությունը, տվել էր այս ազդանշանին մի կարգավիճակ, որը չէր ենթադրում ոստիկանական միջամտության անհրաժեշտություն: Այս կապակցությամբ արդեն ներքին քննություն է սկսվել Սքոթլանդ Յարդում:
Ոստիկանության փորձագետները հանցագործության վայրում բազմաթիվ իրեղեն ապացույցներ են հավաքել, այդ թվում նաև ԴՆԹ նմուշներ ու մատնահետքեր, ինչպես նաև հաջողվել է պարզել հանցագործների երթուղին: Ոստիկանության կայքում հրապարակվել են կողոպուտի ենթարկված վայրի լուսանկարները:
Հաթթոն-Գարդենում գտնվող շենք, որում տեղակայված են մի քանի ընկերությունների գրասենյակներ, և որն ունի ընդհանուր մուտք, հանցագործները ներթափանցել են կողային մուտքից: Պահուստարանը գտնվում է նկուղում, ու որպեսզի հայտնվեն այնտեղ, հանցագործները կանգնեցրել են վերելակն ու երկրորդ հարկից իջել մինչև նկուղի մակարդակ:
Ողջ օպերացիայի ինտերակտիվ մոդելը կարող եք տեսնել այստեղ:
Պողպատե դռան կոտրված ու ճկված ճաղերը
Ամրացված բետոնից պատը, որը կես մետր հաստություն ուներ, հանցագործները ծակել էին ալմաստե ծայրով Hilti DD350 սարքով:
Պահուստարանի տեսքը ներսից. 999 դարակներից բացվել են 72-ը, որոնցից 7-ը դատարկ են եղել, իսկ 11-ը նախատեսված են եղել կոնֆիսկացման համար` սահմանված վճարները չմուծելու դեպքում:
Պահուստարանի դուռը
Պահուստարանի ճկված դարպասները
Դեպի պահուստարան տանող միջանցքը
6 ֆիլմեր, որոնք կարող են ոգեշնչած լինել հանցագործներին
Mirror պարբերականն իր հերթին է հիշել 6 ֆիլմեր, որոնք կարող էին ոգեշնչել հանցագործներին` վերլուծելով վերջիններիս գործողությունները:
1. Օուշենի 11 ընկերները
Երեք խոշոր խաղատներից 150 միլիոն դոլարի կողոպուտ:
2. Կատաղած շներ
Ֆիլմը պատմում է ադամանդների մեծ քանակի կողոպուտի մասին, որն այնպես չի ընթանում, ինչպես նախատեսված էր, ու սկսվում են արյունալի որոնումներ ու հարաբերությունների պարզում, որպեսզի պարզեն, թե ով է «քաշել» բանդային:
3. Կողոպուտ իտալական ձևով (1969)
Ոսկի տեղափոխող զրահամեքենայի կողոպուտի պատմություն` համեմված հումորով ու խելահեղ մրցավազքերով:
4. Խաղաքարտեր, փողեր և երկու հրացան
Ֆիլմ այն մասին, թե ինչի են պատրաստ մարդիկ, միայն թե փակեն թղթախաղով արյունարբու բանդիտին պարտված գումարը:
5. Սովորական կասկածյալներ
Ֆիլմ ամենաանսովոր հանցագործության ու ամենահանճարեղ հանցագործի մասին:
6. Սեքսուալ տականք
Բանդան ներթափանցում է բանկի նկուղ, որտեղ գտնվում է պահուստարանը` լի զարդերով: Ծանոթ է հնչում, այդպես չէ՞ :)