Tert.am-ը գրում է.
The Independent-ը անդրադարձել է Արգենտինայի խորհրդարանում` Ազգային կոնգրեսում, գրանցված հետաքրքրական «ընդմիջմանը»: Այնտեղ հենց նիստի ժամանակ պատգամավորներից Վիկտորյա Դոնդա Պերեսը կրծքով կերակրել է իր մանկանը:
Այժմ այդ լուսանկարը տարածվել է սոցցանցերում` նոր թափով քննարկում առաջացնելով Արևմուտքի համար 2015-ի ամենաթեժ խնդիրներից մեկի` հրապարակայնորեն կրծքով կերակրելու խնդրի շուրջ:
Սոցցանցերում նույնիսկ նոր բառ էր հայտնվել` «կրծքասելֆի» (brelfie), որի միջոցով կանանց խրախուսվում էր հրապարակավ կրծքով կերակրել երեխային և նկարել ու տարածել դա:
Դրան զուգահեռ մի շարք երկրներում անվտանգության աշխատակիցները կոպիտ վերաբերմունք էին ցուցաբերել հասարակական վայրերում կուրծք տվող կանանց:
Իրականում արգենտինական խորհրդարանի դեպքը տեղի է ունեցել այս ամսվա սկզբին, սակայն լուսանկարը միայն այժմ է հրապարակվել:
Ընդհանուր առմամբ սոցցանցերում հավանություն են տվել արգենտինացի քաղաքական գործչի` իր ութ ամսական աղջկան կերակրելու այս քայլին, իսկ տիկին Պերեսին անվանել կին, որից կանայք ամենուր կարող են օրինակ վերցնել: Ըստ ԶԼՄ-ների` սա ցույց է տալիս, թե իրականում ինչ է նշանակում լինել հոգատար մայր և քաղաքական գործիչ միաժամանակ:
