Tert.am-ը գրում է.
Հուլիսի 1-ից , երբ, սկսեցին գործել Սևանում գտնվող հանրային 3 լողափները,Սևանա լճում ջրահեղձության դեպք առ այսօր չի գրանցվել: Tert.am–ի հետ զրույցում ասաց Տարածքային կառավարման և արտակարգ իրավիճակների նախարարության փրկարար ծառայության Գեղարքունիքի մարզային փրկարարական վարչության հատուկ փրկարարական ջոկատի հրամանատար Արմեն Ճզմաչյանը սա բացատրում է կատարված քարոզչական աշխատանքների շնորհիվ քաղաքացիների ինքնագիտակցության բարձրացմամբ:
«Նաև ծառայության որակը տարեցտարի լավանում է, հիմնականում, մարդկանց ինքնագիտակցությունն է բարձրացել, բայց էլի լինում են դեպքեր, երբ կերած-խմած մտնում են: Բայց նկատում ենք, դուրս ենք հանում, բացատրական աշխատանքներ էլ ենք տանում»,-ասաց Արմեն Ճզմաչյանը:
Իհարկե, միջադեպեր եղել են։ «Օրինակ՝ երեկ տղաները նկատեցին, որ հանրային լողափի լողանշանը անցնող է եղել, հետո չէր կարողացել լողալ, տղաները նկատել էին, որ արդեն սուզվում է, փրկել հանել էին ափ, բուժկետում առաջին օգնություն էին ցույց տվել, ամեն ինչ նորմալ էր»,– պատմեց նա:
Ըստ ջրափրկարարի դժբախտ դեպքերի մի մասի պատճառն էլ այն է լինում, որ քամու հետևանքով նավակները հայտնվում են լճի խորքում՝ կենտրոնական մասում և չեն կարողանում ինքնուրույն ափ դուրս գալ:
Հիշեցնենք, որ 44 հոգանոց ջրափրկարարական խմբի կողմից ծառայություն մատուցվում է Սևանի երեք հանրային լողափերում և փրկարարների թիվը բավականացնում է նշված լողափերում և կենտրոնական կայանում 24-ժամյա հերթապահություն կատարելու՝ այլ մարզերում դեպքերի ժամանակ ջրափրկարարական օգնություն ցուցաբերելու համար:
Ի տարբերություն Սևանի ՀՀ այլ ջրային ավազաններում եղել են ջրահեղձության դեպքեր՝ Տավուշում և Սյունիքի մարզերի ջրամբարներից արդեն իսկ դուրս է բերվել 4 դի:
