Tert.am-ը գրում է.
Անցած 2-3 տարիներին Թուրքիան այնքան էր կուրացած Սիրայի նախագահ Բաշար ալ Ասադին տապալելու մոլուցքից՝ մարդկային, տարածքային ու նյութական ռեսուրսներ տրամադրելով ԻՊ-ի մաս կազմող իսլամիստական խմբավորումներին, որ իր համար տեսանելի չէր, որ ԻՊ-ի համար հենց ինքն է թիրախ:
Tert.am-ի հետ զրույցում ասաց քաղաքագետ Ստյոպա Սաֆարյանը՝ մեկնաբանելով, թե ինչու հանկարծ Թուրքիան ԻՊ-ի հետ մտավ բացահայտ առճակատման, ընդհուպ մինչև պատերազմական գործողությունների մեջ:
«Եվ չնայած նրան, որ Թուրքիան Ասադին տապալելու առումով ընդհանուր շահեր ունի ԻՊ-ի հետ, ԻՊ-ի ռազմավարական նպատակների առումով հենց Թուրքիան է թիրախավորվում դիտարկելով այն որպես և՛ «Իսլամական պետության»՝ Մեծ Խալիֆայության տարածք, և՛ Սիրային հարակից երկիր»,- ասաց Ստյոպա Սաֆարյանը:
Ըստ նրա՝ անցած օրերին տեղի ունեցած ահաբեկչությունը հերթական անգամ ցնցեց թուրքական վերնախավին՝ նրա համար հասկանալի դարձնելով, որ իր սիրախաղը ԻՊ-ի հետ կարող է ճակատագրական լինել , և որ դրանով նաև քրդական ռիսկերն է ավելացնում:
Եվ սրանից հետո արդեն , ըստ քաղաքագետի, Թուրքիան վերջ տվեց ԻՊ–ի հետ իր երկակի խաղին:
Հիշեցնենք, որ երեկ առաջին անգամ թուրք-սիրիական սահմանին թուրքական բանակըզինված պայքարի մեջ մտավ «Իսլամական պետություն» խմբավորման հետ:
Ստյոպա Սաֆարյանը հավելեց, որ քանի որ միջազգային հանրությունը շատ գրագետ որսաց քաղաքական պահը, երբ Թուրքիան ինքը դարձավ արդեն ԻՊ-ի ահաբեկչության թիրախը, հիմա արդեն ստիպված էր համաձայնել , որ իր օդային տարածքը տրամադրվի դաշնակից երկրների ռազմուժին՝ ԻՊ-ի դեմ գործողությունների համար:
Մի բան, որ հրաժարվում էր անել նախկինում. 2004-ին Իրաքի կոմպանիայի ժամանակ կամ 2012-ին՝ Սիրիայի դեմ գործողությունների ժամանակ:
«Ի դեպ, արժե հիշել, թե ինչպես անցած տարվա ընթացքում և դրանից առաջ, քանիցս ՄԱԿ-ի որոշումներ ընդունվեցին ՝ ԻՊ-ի ակտիվները սառեցնելու և նրա հավաքագրումների դեմ պայքարելու վերաբերյալ, Թուրքիան հապաղում էր կյանքի կոչել միջազգային հանրության և ՛ ընդունված բանաձևերը, և ՛ դրանց պահանջները»,- ասաց նա:
Ստյոպա Սաֆարյանը հիշեցրեց նաև, որ նախորդ տարի Թուրքիան գրգռեց Արևմուտքին՝ հակաահաբեկչական կազմակերպությունների ցանկից դուրս դնելով Ալ Քաիդայի տեղական որոշ ստորաբաժանումների:
Հիշեցնենք, որ «Մոդուս վիվենդի» կենտրոնի ղեկավար Արա Պապյանն էլ նշել էր , որ Թուրքիային ծանր օրեր են սպասվում, բախումներ, որոնք ունենալու են ձնագնդի էֆեկտ:
«Առավել ևս, չմոռանանք, որ Թուրքիան իսլամական աշխարհի, մասնավորապես ծայրահեղ իսլամիստների կողմից դիտարկվում է որպես դավաճանական պետություն: Դավաճան` մի թիմից մյուս թիմ դարձած»,- մեկնաբանեց քաղաքագետը՝ հավելելով, որ «դավաճան» բառը, ըստ նրա, ունի ոչ միայն նեղ, այլ ավելի լայն իմաստ:
