Tert.am-ը գրում է.
Նոր Հաճընում Սուրբ Ամենափրկիչ եկեղեցու օծման արարողությանը ներկա էր նաև գործարար, նախկին պատգամավոր Խաչատուր Սուքիասյանը, ով լրագրողների հետ զրույցում ասաց, որ ցանկացած եկեղեցու բացում դրական է գնահատում, բայց միաժամանակ գտնում է, որ պետք է նաև վերանորոգել ու վերականգնել դարեր առաջ կառուցված եկեղեցիները:
Հարցին, թե նպատակահարմար չէ ներդրումներն ուղղել տնտեսության մեջ, գործարարը նշեց, որ ցանկացած մարդու ցանկություն է: «Շուկայական հարաբերությունների դեպքում մարդիկ իրենք են որոշում, որտեղ ուղղել իրենց գումարները»,- ասաց նա:
«Եթե դարեր հետ նայենք, մեր տնտեսությունն այդքան էլ հզոր չի եղել, բայց եկեղեցիներ կառուցվել են, միգուցե դա հայկական մտածելակերպ է, միգուցե մի այլ տարածաշրջանում ենք ապրում, որտեղ պետք է եկեղեցաշինությունը մեր ապագան ապահովի»,- ասաց նա:
Իսկ թե մտադրություն չունի մեկն էլ ինքը կառուցի՝ նշեց, որ կարծում է ՀՀ-ում կլինեն մարդիկ, որոնք առաջին հերթին եկեղեցիներ կկառուցեն, կլինեն մարդիկ, որոնք կուզենան տնտեսության մեջ առաջնահերթ ներդրումներ անել: «Ես կնախընտրեմ տնտեսության մեջ ներդրում անել»,- ասաց նա: