Tert.am-ը գրում է.
Թուրքիայում արգելված Քուրդիստանի աշխատավորական կուսակցությունն իր վրա է վերցրել չորեքշաբթի օրը Ջեյլանփընար քաղաքում երկու թուրք ոստիկանների սպանության պատասխանատվությունը՝ դա կապելով Սուրուչում տեղի ունեցած ահաբեկչության հետ: Այդ մասին հաղորդվում է Քուրդիստանի աշխատավորական կուսակցության կայքում, հաղորդում է ria.ru-ն:
Ավելի վաղ՝ չորեքշաբթի օրը, Շանլըուրֆա շրջանի Ջեյլանփընար քաղաքում երկու ոստիկանի մարմին էր հայտնաբերվել իրենց տներում:
Ավելի վաղ CNNTurk-ը տեղեկացնում էր, որ նահանգապետ Իզզեթթին Քյուչուքը չի բացառել, որ տեղի ունեցածը կարող է ահաբեկչություն լինել։
«Այսօր որպես Սուրուչում ահաբեկչության համար հատուցում սպանվել է երկու ոստիկան, ովքեր ներգրավված են եղել «Իսլամական պետության» խմբերի հետ համագործակցությանը: Ակցիայից հետո ոստիկանների զենքը և փաստաթղթերն առգրավվել են»,- ասված է արգելված կազմակերպության մարտական թևի հայտարարությունում:
Երկուշաբթի օրը Սուրուչի մշակութային կենտրոնի առաջ սրճարանում ահաբեկչություն է տեղի ունեցել, որի զոհ է դարձել 32 մարդ և 100-ից ավելին վնասվածքներ են ստացել: Ռումբը պայթել է մշակութային կենտրոնի մուտքի առաջ, որտեղ հավաքվել են թուրքաբնակ քրդերը և երիտասարդական կազմակերպությունների անդամները, որոնք պատրաստվում էին մեկնել Սիրիա «Իսլամական պետություն» ահաբեկչական խմբավորման գրոհայինների հարձակումից տուժած Քոբանի քաղաքի վերականգնմանը օգնության համար:
Իշխանությունները ահաբեկչության պատասխանատվությունը դրել են ԻՊ-ի վրա, որը մահապարտ է օգտագործել:
