Բնականաբար, դրսի օդն անհամեմատ մաքուր է սենյակինից: Ուր էլ լինենք` տանը սպորտդահլիճում, գրասենյակում, միևնույն է` դրսի օդը ավելի մաքուր է, քան փակ տարածքներինը:
Իսկ դա առողջությունը վտանգող ամենալուրջ 5 գործոններից մեկն է համարվում: Մեր աղյուսաշեն կամ էլ բետոնակառույց տներն անընդհատ թունանյութեր են անջատում` ինչպիսին, օրինակ` ֆորմալդեհիդն է: Մեր օդն աղտոտում են բակտերիաները, բորբոսն ու փոշին, աշխատող գազօջախի մոտ կուտակված ածխաթթու գազը:
Բարեբախտաբար, կարելի է այդ վտանգները եթե ոչ վերացնել, ապա գոնե նվազագույնի հասցնել գեղեցիկ ու գեղագիտական տարբերակով` տնաբույս ծաղիկների օգնությամբ: Ստորև ներկայացնենք այն ծաղիկները, որոնք լավագույնս են մաքրում սենյակի օդը:
Քլորոֆիտում
Սա ոչ միայն մաքրում է օդը, այլև լավագույն տարբերակ է սկսնակ ծաղկաբույծի համար: Առանձնակի խնամք չի պահանջում, ծաղկում է ու չի չորանում, չի մահանում երբեք: Արդյունավետ կերպով կլանում է բոլոր այն քիմիական նյութերը, որոնք կիրառվում են տան մաքրության նպատակով:
Դրացենա
Հայտնի է այս բույսի 40 տեսակ: Հրաշալի վերացնում է բենզոլն ու ֆորմալդեհիդը, եռաքլորէթիլենն ու քսիլոլը: Սակայն, նրանք, ովքեր տանը կատու և շուն ունեն, պետք է նկատի ունենան, որ դրացենան թունավոր է նրանց համար: Եթե բնակարանը, որտեղ ապրում եք ձեր սիրելի կենդանիերի հետ, փոքր է, ապա դրացենայի ընտրությունն այնքան էլ հարմար չէ:
Ֆիկուս
Փոքրաչափ ծառերից ամենատարածվածն է սենյակային պայմաններում աճեցնելու իմաստով: Սովորաբար այս ծաղկի բարձրությունը հասնում է 60-120 սմ-ի: Շատ հզոր միջոց է օդը մաքրելու առումով: Իսկ գարնանն ու ամռանն այն կարելի է դուրս հանել, եթե նման հնարավորություն ունեք:
Ֆիկուսը սենյակի օդը մաքրում է բենզոլից, եռաքլորէթիլենից ու ֆորմալդեհիդից:
Սպաթիֆիլում կամ, որ ավելի ականջահաճո է` Կանացի երջանկություն
Բացի այն, որ շատ գեղեցիկ տնաբույս ծաղիկ է, նաև երկարակյաց է, գրեթե հազվադեպ է պատահում, որ բույսը մահանա: Հիմնականում ծաղկում է ամռանը, գերադասում է ստվերոտ ու խոնավ վայրերն ու խոնավ հողը: Օդից վերացնում է ամոնիակը, բենզոլը, ֆորմալդեհիդն ու եռաքլորէթիլենը:
Նեֆրոլեպիս
Այս բույսը զով, բարձր խոնավությամբ վայրեր է սիրում ու անդրադարձող լույս: Լոգարանն իդեալական է այս բույսի համար: Օդը մաքրում է քսիլոլից ու ֆորմալդեհիդից:
Սանսևիերա (կամ` Զոքանչի լեզու)
Այս բույսը գրեթե խնամք չի պահանջում, այն աճում է ամենուր: Պետք է ջրել ուշ-ուշ, սիրում է չոր վայրեր:Արևի լույսի նկատմամբ նույնպես պահանջկոտ չէ: Մաքրում է սենյակի օդը բենզոլից ու ֆորմալդեհիդներից:
Համեդորեա կամ եղեգնարմավ
Սա ֆորմալդեհիդից օդը մաքրող ամենահզոր բույսն է համարվում: Իսկ նորմալ գոյատևման համար այս բույսին մի փոքր արևի լույս է պահանջվում: Կարող է մինչև 3 մ բարձրություն ունենալ, հետն էլ` ցնցող տեսք:
Հալվե
Կիրառման առումով բազմանշանակ բույս է : Ոչ մեծ քանակությամբ հալվե է առաջարկվում ուտել ստամոքս-աղիքային տրակտի տարբեր հիվանդությունների դեպքում: Բուժում է այրոցքը: Հրաշալի մաքրում է սենյակի օդը:
