Tert.am-ը գրում է.
«Կարին» ազգագրական երգի ու պարի համույթի գեղարվեստական ղեկավար Գագիկ Գինոսյանը Tert.am-ի հետ զրույցում նկատեց, թե փաստացի օգոստոսի 1-ից էլեկտրաէներգիայի գինը 7 դրամով թանկացել է, և միայն կա Նախագահի և վարչապետի կողմից արված քաղաքական հայտարարություն, որ նոր սակագինը պետք է փոխհատուցվի Կառավարությունը:
Գագիկ Գինոսյանի խոսքով՝ ժողովրդին հետաքրքրում է, թե ի՞նչ մեխանիզմներով պետք է կառավարությունն իր վրա վերցնի նոր սակագնի ծախսերը:
«Նախագահի քաղաքական հայտարարությունը պետք է ամրագրվի իրավական հիմքով և հորդորվի Ռոբերտ Նազարյանի հանձնաժողովին։ Պետք է դրա նաև իրավական հանգուցալուծման մեխանիզմները հստակ ներկայացնել և հայտարարել ժողովրդին, այլապես ստացվում է օդի մեջ հայտարարություն է, թե մենք հայտարարում ենք, որ կառավարությունն է մուծելու, իսկ թե ինչի՞ հիման վրա, չեն ասում: Կառավարությունը ենթադրենք պատրաստ է վճարել, բայց վաղը ի՞նչ ցուցանիշ է գալու, 1 կիլովատտ էներգիայի համար հաջորդ ամիս ինչ կտրոն է գալու, հստակեցված չէ»,-հարցրեց նա:
ՀՀ վարչապետ Հովիկ Աբրահամյանի մամուլի խոսնակ Գոհար Պողոսյանը Tert.am-ին տեղեկացրեց, որ հարցի լուծման մեխանիզմները քննարկման փուլում են:
«Բնականաբար մինչև սեպտեմբերի կոմունալ վճարումները հարցը լուծում կստանա»,-ասաց նա: