Tert.am-ը գրում է.
Աթենքը Եվրախմբին կխնդրի մի քանի շաբաթով երկարաձգել Հունաստանին հատկացվող օգնության ծրագիրը, քանի դեռ երկրում նախապատրաստական աշխատանքներ են ընթանում տնտեսական միջոցների բարեփոխումների համար:
Այս մասին Եվրախմբի հետ բանակցությունների համար Բրյուսել ժամանելուն պես Reuters գործակալությանն է ասել Հունաստանի ֆիննախարար Յանիս Վարուֆակիսը:
Նախարարն ընդգծել է նաև, որ Արժույթի միջազգային հիմնադրամին պարտքի վճարման համար սահմանված վերջնաժամկետի հարցը, որը հունիսի 30-ն է, պայմանավորված է վարկատուների ճկունությամբ:
Հունաստանի վարչապետ Ալեքսիս Ցիպրասը հայտարարել է, որ հուլիսի 5-ին երկրում հանրաքվե կանցկացվի , որի ժամանակ քաղաքացիներն իրենց կարծիքը կհայտնեն եվրոպացի վարկատուների առաջադրած ֆինօգնության պայմանների վերաբերյալ:
Focus Online պարբերականի հաղորդմամբ` միևնույն ժամանակ Գերմանիայի ֆիննախարար Վոլֆգանգ Շոյբլեն հայտարարել է, որ հանրաքվեի մասին հայտարարելուց հետո Աթենքի հետ հետագա բանակցությունների համար հիմքեր չեն մնացել:
Հիշեցնենք, որ Հունաստանի վարկավորման ծրագրի ժամկետն ավարտվում է հունիսի 30-ին, որից հետո Աթենքը չի կարողանա 7.2 մլրդ եվրո վարկ ստանալ, որն անհրաժեշտ է երկրի պարտքերը մարելու համար:
