Հայաստանը միշտ էլ հայտնի է եղել իր առողջ և օրիգինալ հումորով։ Իսկ ովքե՞ր են վերջին երկու տասնամյակների ընթացքում այդ առողջ ու օրիգինալ հումորի ամենակարկառուն ներկայացուցիչները, մարդիկ, ովքեր, կարելի է ասել, արտադրում են այդ հումորը։ Ձեզ եմ ներկայացնում 10 հումորիստների, ովքեր այս տարիների ընթացքում մեզ ամենաշատն են ժպիտ պարգևել։

10. Արմեն Պետրոսյան (Մենչ)

Արմեն Պետրոսյանը՝ նույն ինքը Մենչը, հումորի աշխարհ ներխուժեց փոթորկի պես ու երկար տարիներ հանդիսանում էր ողջ հայ ազգի պարծանք ՈւՀԱ-ի «Նոր հայեր» թիմի առանցքային անդամներից մեկը։ Հետագայում՝ արդեն ՈւՀԱ-ից դուրս, Մենչը բավականին բեղուն գործունեություն ծավալեց հեռուստատեսությունում, և այսօրվա դրությամբ նա մի քանի այնպիսի գերպոպուլյար հումորային շոուների է մասնակցել պրոդյուսերի, սցենարիստի, դերասանի և հաղորդավարի կարգավիճակներում, ինչպիսիք են «Բլեֆ», «Սուպեր դուետ», «7.5», «Yere1», «Մեյդ ին Արմենիա», «3 պատ», «Ֆուլ հաուս» և այլն:

9. Զառա Սահակյան (Վիտամինի Զառա)

Զառան իսկական հայտնություն դարձավ հայ հեռուստադիտողի համար, երբ «32-ատամ» նախագծի իր թիմակիցների հետ դարձավ առաջինը, ով հայ հեռուստադիտողին հաջողությամբ ներկայացրեց սթենդ-ափ հումորային ժանրը։ Թեև հետագայում այս թիմի անդամների ճանապարհները մեկ առվով չհոսեցին, ու նրանք բաժանվեցին, իսկ «Վիտամին ակումբն» այսօր ստեղծագործական դադարի մեջ է, այնուամենայնիվ, չի կարելի չխոստովանել, որ տարիների ընթացքում Զառան դարձավ ամենավառ պերսոնաժներից մեկը ոչ միայն վիտամինցիների ու 32-ատամցիների թիմերում, այլև ժամանակակից հայկական հումորի աշխարհում՝ դառնալով դրա ամենաակնառու կին ներկայացուցիչը։

8. Աշոտ Ղազարյան

Մի մարդ, ում անունը մի ամբողջ ժամանակաշրջան է մարմնավորում։ 90-ականներին Աշոտ Ղազարյանն այնքան սիրված էր, որ նրա անունը հոմանիշ էր հումոր բառին։ Աշոտ Ղազարյանը Հայաստանի ժողովրդական արտիստի կոչում ունի, և դա զարմանալի չէ, քանի որ նա ասես Լուի Դե Ֆյունեսի մարմնավորած մարդ-նվագախումբը լինի, ով հասցրել է աշխատել թե՛ որպես դերասան, թե՛ որպես հանդիսավար, թե՛ որպես բեմադրող ռեժիսոր, և սա էլ դեռ հերիք չէ, ունի հումորի, ծիծաղի և խոսքի դպրոց-ստուդիա, որտեղ ապագա հումորիստների է նախապատրաստում։ Իրոք, դժվար է թերագնահատել Աշոտ Ղազարյանի դերը հայկական հումորի աշխարհում, ինչպես նաև դժվար է թվարկել բոլոր այն հումորային նախագծերը, որտեղ Աշոտ Ղազարյանն առանցքային մասնակցություն է ունեցել՝ «Մեր բակը» կատակերգությունների ցիկլը, «Հայֆիլմի» տարբեր կինոնկարներ, ամանորյա ու հումորային բազմաթիվ ծրագրեր։

7. Սամվել Բաղդասարյան

Պարոդիա ժանրի իսկական աստված է Սամվել Բաղդասարյանը, ում պես ոչ ոք չի կարողանում նմանակել անվանի հայ քաղաքական գործիչներին ու հատկապես ՀՀ նախագահներին։ Թեև Սամվելը կրթությամբ պատմաբան է, ընդ որում, ուսանել է անգամ ԳԱԱ պատմության ինստիտուտի ասպիրանտուրայում, նա ակտիվորեն ներգրավված է եղել բեմական հումորային գործունեության մեջ 1993 թվականից։ Սամվելը հիմնականում հանդես է գալիս սեփական համերգ-ներկայացումներով, որոնց մի մասը ցուցադրվել է հեռուստատեսությամբ։ Ի դեպ, շնորհիվ Սամվել Բաղդասարյանի՝ ապրիլի 1-ը Հայաստանում ճանաչվել է հումորի ու երգիծանքի օր, ու արդեն միայն սա բավական էր, որպեսզի նրա անունը հավերժանա հայկական հումորի պատմության էջերում։

6. Գարիկ Պապոյան

Սթենդ-ափ ժանրի Հայաստանի ամենակարկառուն ներկայացուցիչ լինելուց զատ՝ Գարիկը նաև տաղանդավոր սցենարիստ է, դերասան, երաժիշտ ու պարզապես լավ մարդ, ով դրական էներգիա է սփռում իր շուրջ։ Շուրջ 10 տարի Գարիկն ուրախացնում է մեզ տարբեր հումորային նախագծերի շրջանակներում, որոնցում առանցքային շրջան են «32 ատամ»-«Վիտամին ակումբ» նախագծերը։ Գարիկի ստեղծած հումորային կերպարներն ու կատակներն այնքան սիրված են, որ դրանցից ոմանք մտել են ժողովրդական խոսքի մեջ և դեռ երկար կպահպանվեն ժողովրդական ֆոլկլյորում ու ժարգոնում։

5. Հայկ Մարության (Կարգին Հայկո)

Հայկական հումորի դաշտում առաջին սերնդափոխությունը եղավ թերևս 90-ականների վերջում, երբ ЕрМИ-ի ու «Նոր հայերի» տղաներն արդեն հասունացել էին ու կարիերային վերելք էին ապրում, իսկ նրանց կողմից ազատվող տեղերը թափուր էին։ Հենց այս տարիներին էլ հայտնվեցին «Կարգին» տղաները, ովքեր միանգամից իրենց սեփական ու ուրույն հումորային ոճը ստեղծեցին։ Կարգին Հայկոն իսկական բում առաջացրեց «Մեր բակը 2» ֆիլմում ունեցած իր դերով, իսկ հետագայում Հայկ-Մկո տանդեմը դարձավ ամենապահանջվածը հայկական հումորի ասպարեզում։ «Կարգին հաղորդման» ավարտից հետո Հայկոն ևս մի քանի հումորային պրոյեկտներ ստեղծեց, որոնցից վերջինն ու, թերևս, ամենահաջողվածը «Սուպեր մամա» կատակերգությունն է։ Հայկական հումորի ասպարեզում եզակի են մարդիկ, ովքեր կարող են մրցակցել Հայկոյի հետ ստեղծած հումորային կերպարների ու ժանրի բազմազանության առումով, ինչի համար էլ Հայկոն զբաղեցնում է այս ցուցակի 5-րդ պատվավոր հորիզոնականը։

4. Սերգեյ Սարգսյան 

Սերգեյն իսկական հեղափոխական է հումորի ասպարեզում։ Հանդիսանալով «ArmComedy» նախագծի համահիմնադիրներից մեկը, ով, ի դեպ, դասախոս է Վալերի Բրյուսովի անվան պետական լեզվաբանական ինստիտուտում, Սերգեյն ու իր ընկերներն իսկական հեղափոխություն արեցին՝ սկզբում ասպարեզ մտցնելով պարբերական քաղաքական հումորի ժանրը, իսկ հետո իրենց համացանցային պրոյեկտը տեղափոխելով հեռուստաէկրաններ։ Ոչ ոք չի վիճի, որ այսօրվա դրությամբ «ArmComedy»-ն ամենասիրված ու հաջողված հեռուստանախագծերից է, ու դա մեծապես պայմանավորված է ինտելեկտուալ հումորի այն հարուստ պաշարով, որը կրում է Սերգեյը։

3. Մկրտիչ Արզումանյան

Դերասան, սցենարիստ, հաղորդավար, պրոդյուսեր և իհարկե հումորիստ Մկրտիչ Արզումանյանը՝ Մկոն, կարող է մրցակցել ցանկացած հայտնի մարդու հետ սիրվածության ու ճանաչվածության առումով, և դա զարմանալի չէ, քանի որ Մկոն հասցրել է մասնակցել բազմաթիվ հումորային նախագծերի ու նկարահանվել է մի քանի հաջողված կատակերգություններում։ Նախկին ՈւՀԱ-ական (ի դեպ, Մկոն ընդգրկվել էր նաև ՈւՀԱ-ի «21-րդ դարի հավաքականի» կազմում) Մկոյի «ծառայողական ցուցակն» իր հագեցվածությամբ կարող է զիջել միայն Մկոյի կերտած կերպարների թվին՝ «Կարգին կասետ», «Թույն կասետ», «Մեր բակը», «Մեր բակը 2», «Կարգին հաղորդում», «Ալա բալա նիցա», «Քայլ ձիով»… Մկոն ծնունդով Հայաստանի հումորի մայրաքաղաքից է՝ Գյումրիից, ու զարմանալի չէ ամենևին, որ այսօրվա դրությամբ նա հանդիսանում է ամենասիրված ու լավագույն հումորիստներից մեկը։

2. Վարդան Պետրոսյան

Դժվար է հայկական հումորի դաշտում գտնել երկրորդ այսպիսի բազմապրոֆիլանի, հարուստ ու ինտելեկտուալ հումորով վառ անհատականության, ում հումորները երբեք չեն հնանում ու չեն կորցնում իրենց ակտուալությունը։ Վարդան Պետրոսյանն այն հումորիստն է, ով կարողանում տարիներ շարունակ մեզ ծիծաղեցնել է մեր գերխնդիրների վրա, ու շատ անգամներ հենց դա է օգնել շատերին չկորցնելու հույսն ու հավատն առ իրենց երկիր։ Վարդան Պետրոսյանը մշտապես կարողացել է հասարակական-քաղաքական խնդիրներն ու երևույթներն այնպիսի լույսի ներքո ներկայացնել, որ մարդ ծիծաղում է լալու աստիճան, բայց հետո լրջորեն խորհում է այդ խնդիրների մասին, ու հենց սրանում է կայանում Վարդան Պետրոսյանի մեծությունը՝ որպես ժամանակակից մեծագույն երկիծաբան։

1. Գարիկ Մարտիրոսյան

Գարիկ Մարտիրոսյանն այն մարդն է, ով շնորհիվ իր հումորի զգացման ու ինտելեկտի՝ դարձավ ոչ միայն մի ամբողջ ազգի «այցեքարտերից» մեկն աշխարհի համար, այլև վերածվեց միջազգային արժեքի, քանի որ այսօրվա դրությամբ Գարիկին սիրում ու համարում են իրենցը գրեթե ողջ հետխորհրդային տարածքում։ Բացի սա, Գարիկն առանցքային դիրք է զբաղեցնում այն մարդկանց թիմում, ովքեր ոչ միայն կարողացան հայկական հումորը միջազգային ասպարեզ հանել, այլև մոնետիզացնել այն ու դարձնել իսկական բրենդ։ Այսօր հպարտությամբ ու վստահությամբ կարելի է ասել, որ Գարիկը հումորի արքան է, ընդ որում՝ ոչ միայն Հայաստանում, այլև Ռուսաստանում և այլ հետխորհրդային երկրներում։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել