Araratnews.am-ը գրում է.
Այսօր լրագրողների հետ հանդիպման ժամանակ, խոսելով ՀԷՑ-ի հիմնախնդրից, տնտեսագետ Վահագն Խաչատրյանը նկատեց, որ մինչ բոլորը կենտրոնացել են Հայաստանի էլցացների վրա, մի շարք այլ կազմակերպություններ ևս հայտ են ներկայացրել էլէներգիայի սակագինը բարձրացնելու համար:
Որպես այդպիսիք՝ բանախոսը նշեց Հրազդանի երկու էլեկտրաբլոկները, Բարձրավոլտ էլեկտրացանցը և մի քանի այլ կազմակերպություններ:
Վերջիններս սակագնի կրկնակի բարձրացման հայտ են ներկայացրել. «Վերջին 4 ամսում էլեկտրաէներգիայի սպառումը նվազել է 8 %-ով։ Վերջին երեք տարվա փորձը ցույց է տալիս, որ ինչքան սակագինը բարձրանում է, այնքան հենց ընկերության ֆինանսական վիճակն է վատանում, որովհետև մարդիկ չեն կարողանում այդքան գումար վճարել և չեն սպառում էլէներգիա, ուստի՝ որքան սակագինը թանկանա, այնքան էլցանցերը ևս վնաս են կրելու»,-նշեց բանախոսը:
Վերջինս հավելեց, որ այս կազմակերպությունները նպատակ ունեն բարձրացնել աշխատակիցների միջին աշխատավարձը, որն, ըստ բանախոսի, դժվար թե հաջողվի անել ազգաբնակչության հաշվին: Տնտեսագետն ընդգծեց նաև, որ էլցանցերի ներդրումները 50 %-ով, իսկ տրանսֆերտները 40 %-ով նվազել են, իսկ քաղաքացիները գնողունակ չեն, ուստի չեն կարող վճարել սակագնի թանկացման համար:
«Վերջին 4 ամսում էլեկտրաէներգիայի սպառումը նվազել է 8 %-ով: Սա երկու պատճառ կարող է ունենալ. մեկը այն է, որ մարդիկ են պակասել, մյուսը այն, որ նրանք հրաժարվում են սպառել էլէներգիա: Ստացվում էˋ սակագնի բարձրացումը երկու բան է առաջարկումˋ կամ հեռանալ երկրից կամ էլ ապրել այստեղ, բայց սակավ օգտագործել էլէներգիա»,-եզրափակեց նա:
