Լինա Այուբին սիրում է շվայտ կյանքով ապրել։ Նա հաճախ իր ճոխ կյանքի լուսանկարները հրապարակում է «Instagram»-ում, որտեղ ավելի քան 18,000 հետևորդ ունի։ Այս աղջկա խելքն իրենը չէ սելֆիներ լուսանկարելու համար։
Ամենատարօրինակն այն է, որ նա աղքատության նպաստ է ստանում կառավարությունից, թեպետ օրը 600 դոլար է վաստակում՝ աշխատելով իբրև հարսանեկան դիմահարդար։
Լինան թաքցնում է իր եկամուտի չափը՝ նշելով, որ շաբաթական առավելագույնը 75 դոլար է աշխատում։ Եթե նրա խոսքերն իսկապես ճիշտ են, ապա որտեղի՞ց նրան շքեղ «Mercedes Benz» մեքենան, սեփական նավն ու այն բոլոր թանկարժեք զարդերը, որոնք նա առանց ամաչելու ցուցադրում է իր ինստագրամյան էջում։
Լինայի «Mercedes Benz SLK200»-ը մոտ 100,000 դոլար արժե։ Ապրիլ ամսին նա վաճառեց իր սեփական տունը 680,000 դոլարով։
Նա, անշուշտ, աղքատության նպաստով չէր կարող այդքան թանկարժեք բնակարան ձեռք բերել։ Հաճախորդների խոսքերով՝ դիմահարդարման մեկ ժամի համար Լինան նվազագույնը 100 դոլար է վերցնում։ Նա ոչ միայն աղքատության, այլև միայնակ մոր նպաստ է ստանում։
Ավելի քան 5 տարի է, ինչ Լինան դիմահարդարման բիզնես ունի։ Նա իր դիմահարդարման ձիրքը կիրառում է ոչ միայն իր հաճախորդների, այլև իր վրա՝ փորձելով հնարավորինս ընդգծել հայտնի ռիելիթի աստղ Քիմ Քարդաշյանի հետ ունեցած իր նմանությունը։ Լինան ասում է, որ իր և Քիմի միջև առկա արտաքին նմանություն օգնում է իրեն ավելի շատ հաճախորդներ գրավել։ Դրամական հարցերում նա կարծես Քիմից էլ ճարպիկ է, սակայն ի տարբերություն Քիմի՝ նա անազնիվ միջոցներով է փորձում հարստանալ։
Իր հայրենիքում նրան հաճախ կոչում են «Ավստրալիայի Քիմ Քարդաշյան»։ Երբ «Daily Mail»-ի ավստրալիական բաժինը փորձեց կապ հաստատել նրա հետ, նա պատասխանեց, որ շատ զբաղված է և հետ կզանգի, երբ ազատ ժամանակ ունենա։
Կարծես նա ինքն էլ հեռուստաաստղ դառնալու հավակնություններ ունի։ Երեքշաբթի օրը «Channel 9» հեռուստաալիքով նրա մասին հաղորդում է հեռարձակվելու: Աստված գիտե, թե էլ ինչ բացահայտումներ կլինեն այս հաղորդման ընթացքում։