Tert.am-ը գրում է.
Հայաստանի անկախության 24-րդ տարում շրջանառության մեջ է դրվել «Թանգարանների և ՀՀ թանգարանային ֆոնդի մասին» օրենք, և այսքան տարի այս ոլորտը կարգավորվել է առանց մայր օրենքի: Այս մասին տեղեկացնում է ԱԺ կայքը:
Հիշեցնենք, որ « Էրեբունի» պատմահնագիտական արգելոց-թանգարանի տնօրեն Գագիկ Գյուրջյանը հայտարարել էր, որ Վերնիսաժում ազատ վաճառվում են թանգարանների համար հնագիտական արժեք ներկայացնող տարբեր կերամիկական ու բրոնզե իրեր` հենց օրենք չունենալու պատճառով:
Նախագծին կցված փաթեթում ևս նշվում է, որ թեև վերջին տարիներին նյութական և ոչ նյութական մշակութային ժառանգության վերաբերյալ ընդունվել են մի շարք ՀՀ օրենքներ («Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին», «Մշակութային արժեքների արտահանման և ներմուծման մասին», «Արխիվային գործի մասին», «Ոչ նյութական մշակութային ժառանգության մասին», «Գրադարանների և գրադարանային գործի մասին»), չկարգավորված է մնում թանգարանների ոլորտը:
Օրենքի նախագծի մշակման նպատակով նախարարության կողմից ուսումնասիրվել է թանգարանային գործի զարգացվածության մակարդակով աչքի ընկնող երկրների փորձը` Կանադա, ԱՄՆ, Միացյալ Թագավորություն, Ֆրանսիա, Գերմանիա, Լատվիա, Ճապոնիա: Իսկ օրենքի նախագծում կիրառվել է նաև Միավորված ազգերի կազմակերպության ՅՈՒՆԵՍԿՕ-ի շրջանակներում Թանգարանային միջազգային խորհրդի կողմից ընդունված Թանգարանների աշխատողների մասնագիտական վարքագծի կանոնագիրքը, ինչը եվրոպական պետությունների` Գերմանիայի Դաշնության, Լյուքսեմբուրգի, Իտալիայի թանգարանների ղեկավարման համար ճանաչվել է իրավական փաստաթուղթ:
Օրենքի նախագծում նշվում է, որ թանգարանի շենքերը և զբաղեցրած տարածքները հասարակության կամ պետության կարիքների համար կարող են օտարվել միայն բացառիկ դեպքերում` օրենքով սահմանված կարգով:
Իսկ հավատարմագրված թանգարանի թանգարանային առարկաները և հավաքածուները վերցվում են մշտական պահպանության թանգարանի ֆոնդում:
Մեկ այլ կետով ամրագրված է.«Թանգարանի ղեկավարը պարտավոր է ապահովել թանգարանային առարկաների և հավաքածուների անվտանգությունը»:
Նախատեսված է նաև Հայաստանում արտակարգ իրավիճակում ՀՀ թանգարանային ֆոնդում և ՀՀ ազգային թանգարանային ֆոնդում ընդգրկված թանգարանային առարկաների և հավաքածուների տարհանման և դրանց պաշտպանության կարգը: