«amfAR»-ի գալա երեկույթը Կաննի միջազգային կինոփառատոնի ամենաթեժ խնջույքներից է, սակայն այս միջոցառումը տարբերվում է կինոփառատոնի շրջանակներում անցկացվող մյուս բոլոր միջոցառումներից։ Այստեղ աստղերը հավաքվում են ոչ թե սոսկ իրենց տոնական զգեստները ցուցադրելու, այլ հանուն ՁԻԱՀ-ի դեմ պայքարի բարեգործական ակցիա անցկացնելու։ Նախորդ տարի «amfAR» հիմնադրամի համար 35 միլիոն դոլար հավաքվեց գալա երեկույթից հետո։ Երեկույթը կրում է «Կինոն ընդդեմ ՄԻԱՎ-ի» խորագիրը։ «amfAR» հիմնադրամի նպատակն է մինչև 2020 թվականը գտնել ՄԻԱՎ/ՁԻԱՀ-ի բուժումը։ Այս տարի երեկույթն իրականացվում է 22-րդ անգամ։ Իբրև այս աստղաբույլ երեկույթի անցկացման վայր ընտրվել էր «Hotel du Cap-Eden-Roc»-ի շքեղ դահլիճը։ Այս բարեգործական միջոցառման ընթացքում տեղի ունեցան նորաձևության ցուցադրություն, աճուրդ և համերգային ծրագիր այնպիսի հռչակավոր երգիչների մասնակցությամբ, ինչպիսիք են Չարլի XCX-ը, Անդրեա Բոչելին և Մերի Ջեյ Բլայջը։ Դերասանուհիներն ու մոդելները շլացուցիչ տեսքով էին ներկայացել այս հանդիսավոր տոնակատարությանը։ Այս հոդվածում մենք առանձնացրել ենք երեկույթի հյուրերի ամենաշքեղ զգեստները, որոնցից շատերը մի ողջ կարողություն արժեն։
1. Քենդալ Ջեններ
Մենք սովոր ենք տեսնել Քենդալ Ջեններին կիպ տաբատներով, կարճ կիսաշրջազգեստներով ու երկարաճիտ սանդալներով։ Այնուամենայնիվ, նա հավուր պատշաճի էր նախապատրաստվել Կաննի բարեգործական գալային։
Ռիելիթի աստղը կրում էր «Calvin Klein»-ի լայնաքղանցքը զգեստը, որն այնքան երկար էր, որ գրավում էր գրեթե ողջ պոդիումը, իսկ եռանկյունաձև կտրվածքով թոփն ի ցույց էր դնում Քենդալի բարակ իրանը։
Այնուամենայնիվ, Քենդալը երկար չկարողացավ դիմակայել կարճ շրջազգեստ կրելու գայթակղությանը և ձեռքի մեկ շարժումով ազատվեց երկար փեշից։
2. Ռիտա Օրա
Ռիտա Օրան կրում էր հեղինակավոր «Marchesa» բրենդի վառ կարմիր զգեստ, որն աչքի էր ընկնում համարձակ գրգռաճեղքով։ Այս 5000 դոլարանոց զգեստը ճակատագրական կնոջ տեսք էր հաղորդել 24-ամյա Ռիտային։
Նա մինիմալիստական մոտեցում էր ցուցաբերել աքսեսուարների հարցում և կրում էր խոշոր արծաթագույն ականջօղեր ու մատանիներ, որոնք սքանչելիորեն համադրվում էին նրա արծաթագույն ու սև բարձրակրունկների հետ։ Ինչ խոսք, զգեստը գեղեցիկ է, սակայն 5000 դոլարով ես մեկի փոխարեն 5 այսպիսի զգեստ կկարեի։ Ափսոս, որ Ռիտան տեղս չգիտի։
Ռիտա Օրան դիզայներ Ջորջինա Չապմանի հետ
3. Շանել Իման
Մոդել Շանել Իմանին նայելով՝ միայն մի բան կարելի է ասել. վաու կամ վախ կամ ուխ... Մի խոսքով, առանց բացականչությունների ու հոգոցների այս գեղեցկուհու կողքով անցնելը դժվար է, բայց դե ամեն դեպքում զսպեք ձեզ։
Շանելը ներկայացել էր երեկույթին ծաղկաթերթիկներով զարդարված լայնաքղանցք զգեստով։ Զգեստի գրգռաճեղքան այնքան խորն էր, որ ավելի լավ է այլևս չխորանանք ու լռելյայն հիանանք մոդելի էլեգանտ տեսքով։
4. Այշվարիա Ռայ և Փերիզ Հիլթոն
Բոլիվուդյան գեղեցկուհի Այշվարիա Ռայը և հոլիվուդյան դերասանուհի Փերիզ Հիլթոնը նույն ոճի զգեստներ էին կրում։ Այշվարիան երեկույթի այն հազվագյուտ աստղերից էր, ով զգեստը համադրել էր մանյակով։ Մյուս աստղերն, ասես խոսքները մեկ արած, հրաժարվել էին այս աքսեսուարից։
5. Ադրիանա Լիմա
Ադրիանա Լիմայի զգեստում գրգռաճեղքերի պակաս չէր զգացվում։ Սև պսպղուն զգեստն ընդգծում էր աստղի նուրբ կազմվածքը։ Անշուշտ, չենք կարող հերքել, որ նա այնպիսի կազմվածք ունի, որ առանց կաշկանդվելու կարող է ի ցույց դնել իր բարեմասնությունները, սակայն խնայի՛ր մեզ, Ադրիա՛նա։
6. Գիգի Հադիդ
Գիգի Հադիդը ևս որոշել էր համարձակ կերպարով հետ չմնալ մյուս աստղերից, սակայն նա այնքան բաց զգեստ էր ընտրել, որ ինքն էլ էր նեղվում դրանից ու ժամանակ առ ժամանակ ձեռքերով շտկում էր զգեստը։
Աղջիկն ինքն էլ չի կողմնորոշվում՝ բացել, թե փակել։ Թոմ Ֆորդի կողմից մոդելավորված այս զգեստը միայն մեկ թերություն ունի. այն այնքան բացեիբաց է ցուցադրում Գիգիի բարեմասնությունները, որ երևակայությունն աշխատացնելու կարիք չի էլ լինում։
7. Շանինա Շեյք
«Victorias Secret»-ի մոդել Շանինա Շեյքը
«Victorias Secret»-ի մոդել Շանինա Շեյքը երեկույթին եկել էր Ֆիլիպ Փլեյնի մոդելավորած շղարշե զգեստով, որը նախշազարդված էր տերևների պատկերներով։ Դասական ու ավանգարդ ոճերը ներդաշնակորեն միահյուսված են այս շքեղ զգեստում։
8. Իրինա Շեյք
Իրինա Շեյքն իր այս սքանչելի զգեստը ձեռք է բերել «Versace» նորաձևության տնից։ 29-ամյա աստղը պարզապես փայլում էր երեկույթին։ Լայնաքղանցք շղարշե զգեստի տակից թափանցում էին աստղի սլացիկ ոտքերը։ Այն ամբողջովին զարդարված էր մանր պսպղուն ուլունքներով և կիպ գրկում էր Իրինայի նուրբ իրանը։ Իրինան համադրել էր այս տոնական զգեստն արծաթազօծ ապարանջանի ու ականջօղերի հետ։
9. Ջորդան Դան
Ջորդան Դանը երեկույթին ներկայացել էր մուգ կապույտ դասական զգեստով, որը կիպ գրկում էր նրա մարմինը մինչև ծնկները, իսկ ծնկներից վար լայնանում՝ մոդելին էկզոտիկ ջրահարսի տեսք հաղորդելով։
10. Եվա Լոնգորիա
40-ամյա մոդել Եվա Լոնգորիան կրում էր երկնագույն կոկտեյլային զգեստ, որի գրգռաճեղքը հասնում էր մինչև որովայն։ Նրան կարելի է բնութագրել մեկ արտահայտությամբ՝ Մոխրոտիկը հասուն տարիքում։ Լիբանանցի դիզայներ Ջորջես Հոբեյկան հենց այս էֆեկտն էր ցանկանում ստանալ։ Ինչ խոսք, երեկույթի մյուս մասնակիցների համեմատությամբ Եվան համեստության տիպար է, իսկական տուն տանելու աղջիկ։