Հայաստանի ազգային վիճակագրական ծառայության հրապարակած 2015-ի հունվար-ապրիլ ամիսների սոցիալ-տնտեսական ցուցանիշների համաձայն՝ Հայաստանի տնտեսական ակտիվության ցուցանիշը (ՏԱՑ) նախորդ տարվա հունվար-ապրիլի համեմատ աճել է 2,7 տոկոսով։
Ըստ տնտեսության ճյուղերի՝ ամենամեծ աճն արձանագրել են արդյունաբերությունը և գյուղատնտեսությունը, ապա ծառայությունները: Շինարարությունում աճը չնչին է, իսկ առևտրում անկում է արձանագրվել: Մասնավորապես, արդյունաբերության արտադրանքի ծավալներն աճել են 4,2 տոկոսով, գյուղատնտեսությանը` 4,8 տոկոսով, ծառայություններինը` 3,1 տոկոսով, շինարարությանը` 0,5 տոկոսով, առևտրինը նվազել է 7,6 տոկոսով:
Միևնույն ժամանակ ապրիլին մարտի նկատմամբ արդյունաբերությունն աճել է 0,4 տոկոսով, գյուղատնտեսությունը` 46,6 տոկոսով (էական դեր ունի սեզոնային գործոնը), շինարարությունը 3,5 տոկոսով, առևտուրը նվազել է 4 տոկոսով, ծառայությունները` 2,1 տոկոսով:
Ինչ վերաբերում է 2015-ի ապրիլի ցուցանիշների համեմատությանը 2014-ի ապրիլի հետ, ապա արդյունաբերությունը երկնիշ աճ է ունեցել` 10,6 տոկոս, գյուղատնտեսությունը` 5,2 տոկոս, ծառայությունները` 0,7 տոկոս, շինարարությունը` 0,2 տոկոս, առևտուրն արձանագրել է անկում` 11 տոկոսով:
