Tert.am-ը գրում է.
Հայաստանը շատ է կարևորում քաղաքական երկխոսության շարունակությունը եվրոպական կառույցների հետ, ինչի մասին մեկ անգամ չէ, որ նշվել է թե′ ՀՀ Նախագահի, թե′ իշխանության տարբեր ներկայացուցիչների կողմից: Այս մասին լրագրողների հետ զրույցում ասաց ՀՀԿ մամուլի խոսնակ, ԱԺ փոխնախագահ Էդուարդ Շարմազանովը՝ պատասխանելով հարցին, թե արդյո՞ք որոշված է՝ Ռիգայի գագաթնաժողովին Հայաստանի կողմից մասնակցություն լինելու է ՀՀ Նախգահի՞ մակարդակով, թե՞ ոչ:
«Հայաստանը կարևորում է քաղաքական երկխոսության շարունակությունը, սա է մեր պաշտոնական դիրքորոշումը»,-ասաց նա և նշեց, որ մնացած հարցերի պատասխանները պատճաշ կերպով կներկայացնեն:
Ինչ վերաբերում է հարցին, թե ստորագրվելու՞ է որևէ փաստաթուղթ, նա ասաց, որ թեև շատ բանից է տեղյակ, սակայն պատշաճ չի համարում ամեն ինչ հրապարակել, և ինքը չէ այն պաշտոնյան, ով պետք է պաշտոնապես հայտարարի այդ մասին:
«Մե′նք էլ, եվրոպացինե′րն էլ գտնում ենք, որ մեր հարաբերությունները պետք է շարունակենք: Հայաստանի Հանրապետությունը շատ է կարևորում քաղաքական երկխոսության շարունակությունը, մենք շահագրգռված ենք և նման շահագրգռվածություն տեսնում ենք եվրոպական գործընկերների կողմից»,-ասաց նա:
