Tert.am-ը գրում է.
Ապրիլի 24-ին ՀՀ արտաքին գործերի նախարարի տեղակալ Աշոտ Հովակիմյանը հանդիպել է Ուրուգվայի Արևելյան Հանրապետության արտաքին գործերի նախարարի տեղակալ Խոսե Լուիս Կանսելայի հետ, ով գլխավորում էր իր երկրի պատվիրակությունը Հայոց ցեղասպանության 100-րդ տարելիցին նվիրված միջոցառումներին:
Ինչպես հայտնում են ՀՀ արտգործնախարարությունից՝ հանդիպման ընթացքում քննարկվել են հայ-ուրուգվայական երկկողմ հարաբերություններին վերաբերող հարցերի լայն շրջանակ: Երկուստեք հատուկ կարևորվել է Հայաստանի և Ուրուգվայի արտգործնախարարությունների միջև խորհրդակցությունների շարունակումը, ակտիվ համագործակցությունը միջազգային կազմակերպություններում, երկու երկրների միջև ժողովրդական դիվանագիտության խորացումը: Աշոտ Հովակիմյանը մանրամասն անդրադարձել է ղարաբաղյան հակամարտության կարգավորմանը, ինչպես նաև՝ տարածաշրջանային այլ խնդիրների:
Ապրիլի 23-ին տեղի է ունեցել Ա.Հովակիմյանի հանդիպումը «Ընդդեմ ցեղասպանության հանցագործության» գլոբալ ֆորումին մասնակցող Չիլիի պաշտոնական պատվիրակության ղեկավար, Չիլիի Ազգային Կոնգրեսի պատգամավորների պալատի փոխխոսնակ Դենիզ Պասկալի հետ: Կողմերը գոհունակություն են հայտնել հայ-չիլիական հարաբերությունների ակտիվացման վերաբերյալ, կարևորել քաղաքական ակտիվ երկխոսության շարունակումը, երկու երկրների միջև տարբեր բնագավառներում համագործակցության զարգացումը: Աշոտ Հովակիմյանը շնորհակալություն է հայտնել ապրիլի 14-ին պատգամավորների պալատի կողմից Հայոց ցեղասպանությունը ճանաչող և դատապարտող բանաձև ընդունելու համար, որն ամբողջացրել է Չիլիի կողմից՝ 2007 թվականին Հայոց ցեղասպանության ճանաչումը: