Tert.am-ը գրում է.
Լիբանանը ապրիլի 24-ին ոգեկոչում է Հայոց ցեղասպանության հիշատակը և ներկայացնում հայկական հարուստ ժառանգությունը:
Ինչպես հաղորդում է globalvoicesonline.org-ը` Լիբանանն առաջին երկրներից էր, որտեղ ապաստան գտան հայ փախստականները 1915-ի ցեղասպանությունից հետո, և վերջին 100 տարում լիբանանահայերն առաջատար դեր են խաղացել երկրի մշակույթի, արվեստի ու գիտությունների զարգացման գործում:
Այսօր հայերը բնակվում են Բեյրութի ծայրամասում, հիմնականում` Բուրջ Համուդ թաղամասում, որը հիմնադրել են Ցեղասպանությունից փրկված հայերը: Լիբանանում է գտնվում Հայաստանից դուրս գտնվող միակ հայկական համալսարանը` Հայկազյան համալսարանը, որը հիմնադրվել է 60-ականներին:
Հայոց ժառանգության կարևորությունը գնահատելու համար Audio Kultur ամսագիրը ռեպորտաժ է պատրաստել` «Դեռ այստեղ է, դեռ արյունահոսում է», խորագրով, որում ներկայացրել է 5 լիբանանահայի պատմություն, ովքեր հատուկ նախաձեռնության շրջանակում արյուն են հանձնել` ի հիշատակ Ցեղասպանության ժամանակ զոհված իրենց հարազատների և բոլոր հայերի:
Լիբանանահայերը Ցեղասպանության 100-րդ տարելիցը ոգեկոչել են #AgainstAllGenocides խորագրի ներքո («Ընդդեմ բոլոր ցեղասպանությունների»):