Tert.am-ը գրում է.
Կառավարությունն այսօր հավանություն տվեց ակցիզային հարկով հարկման ենթակա որոշ ապրանքների դրոշմավորման համար «2011» թվագրմամբ ակցիզային դրոշմանիշերը կիրառությունից հանելու և «2011» թվագրմամբ ակցիզային դրոշմանիշերով դրոշմավորված ապրանքների իրացումն արգելելու մասին:
Ինչպես նիստին նշեց ՀՀ ֆինանսների փոխնախարար Վախթանգ Միրումյանը, զուգահեռաբար մինչև 2016թ-ի հունվարի 1-ը հնարավորություն կտրվի արդեն իսկ շրջանառության մեջ եղած «2011» թվագրումով դրոշմավորված ապրանքները իրացնելու համար:
ՀՀ վարչապետ Հովիկ Աբրահամյանին զարմանք պատճառեց, որ մինչ օրս շուկայում առկա են «2011» թվագրմամբ ապրանքներ: Նա հարցրեց փոխնախարարին, թե հատկապես որ շուկայում են դրանք և տեղեկացավ, որ հիմնականում ալկոհոլի:
«Իսկ գույքագրե՞լ եք, քանակությունը մե՞ծ է»,-հարցրեց վարչապետը:
«Գույքագրման պահանջ քանի որ չկար ներկայացված, պարզապես մոնիտորինգ ենք իրականացրել և կարծում ենք, որ 2016թ-ն այն ժամկետն է, որը բավարար կլինի ապրանքը իրացնելու համար»,-պատասխանեց փոխնախարարը: