Կոտայքի մարզի Նոր գյուղ համայնքում գործում է «Տոնուս-Լես» լաբորատորիան, որը հանդիսանում է սննդի և դեղերի անվտանգության փորձագիտական ժամանակակից լաբորատորիա և հնարավորություն է տալիս հանրապետությունում արտադրվող, ներկրվող դեղերի ու սննդի համար իրականացնել որակի և կենսահամարժեքության, ինչպես նաև կենսաբանական և մանրէաբանական փորձաքննություններ` նպաստելով դրանց որակական չափանիշների ապահովմանը:
Լաբորատորիան վերջերս ստացել է միջազգային ISO 9001-2008 հավատարմագրում, որը տարածաշրջանում առաջինն է:
Այս փաստը շատ կարևոր է, քանզի միջազգային հավատարմագրումը հնարավորություն կտա տեղական արտադրողներին արտերկրի փոխարեն տեղում ստանալ արտադրանքի լաբորատոր փորձագիտական եզրակացությունը և որակի հավաստագիրը, ինչն էլ էապես կկրճատի ընկերությունների ծախսերն ու ժամանակը:
Վարչապետ Հովիկ Աբրահամյանի հետ հանդիպման ընթացքում լաբորատորիայի ղեկավարները վստահեցրեցին, որ միջազգային հավատարմագրման արդյունքում լաբորատորիայի ներկայացրած եզրակացությունը հիմք կընդունվի աշխարհի բոլոր երկրներում:
