Tert.am-ը գրում է․
Սիրիայի իշխանությունները ՄԱԿ-ի գլխավոր քարտուղար Բան Կի-մունին և Անվտանգության խորհրդին կոչ են արել դատապարտել Թուրքիայի ռազմական գործողությունը Սիրիայի տարածքում, որի մասին հայտնի էր դարձել նախօրեին:
Ըստ ՌԻԱ Նովոստիի՝ Սիրիայի ԱԳՆ-ն համապատասխան պահանջ է հղել միջազգային կառույցին: Փաստաղթում Թուրքիայի գործողությունները «ագրեսիա» են բնորոշված: Ըստ Դամասկոսի՝ Թուրքիայի քայլերը դատապարտելի են նաև ՄԱԿ-ի դրույթների առումով:
Նախօրեին Սիրիան Անկարային նախազգուշացում էր արել, մեղադրել իսլամիստ ահաբեկիչներին սատարելու համար:
Կիրակի գիշերը թուրքական բանակի 700 զինվորական և զինատեխնիկայի մոտ 100 միավոր, այդ թվում՝ 39 տանկ, ներխուժել էին Սիրիայի տարածք՝ Եփրատ գետի կղզիներից մեկը: Այնտեղից տարհանվել էր Օսմանների դինաստիայի նախնիներից շահ Սուլեյմանի դամբարանը, այնտեղ պահվող արժեքավոր հնություններ և այդ ամենը հսկող թուրք զինվորականներին՝ Իսլամական պետության զինյալներից այդ ամենը հեռու պահելու պատրվակով:
1921-ի պայմանավորվածության համաձայն՝ թուրքական այդ սրբավայրը պետք է մնա Սիրիայի տարածքում, սակայն Թուրքիան իրավունք ունի այնտեղ իր դրոշը բարձրացնել և պատվո պահակախումբ պահել:
Սիրիայի իշխանությունները նկատել էին, որ Իսլամական պետության վերահսկողության տակ գտնվող այդ տարածքներում քանդվում էին եկեղեցիներ, սունի մուսուլմանների դամբարաններ, սակայն թուրք շահ Սուլեյմանի դամբարանին ոչ ոք ձեռք չէր տալիս, ինչը մատնում է Թուրքիա - Իսլամական պետություն կապերը: