Tert.am-ը գրում է․
Կենտրոնական բանկի խորհրդի անդամ Արմենակ Դարբինյանը Tert.am-ի հետ զրույցում նշեց, որ հաշվի առնելով մի շարք հանգամանքներ` արտաքին շոկերի հավանականությունը պահպանվում է: Անդրադառնալով Հայաստանի տնտեսական աճի կանխատեսմանը, նա նշեց, որ երևի այդ կանխատեսումները կճշգրտվեն` հնարավոր է նաև նվազման ուղղությամբ: Ինչ վերաբերում է ԵՏՄ-ի շրջանակներում ռուբլու ավելի կարևորմանը, ապա նա նշեց, որ հիմա ռուբլու նկատմամբ վստահությունը քչացել է. «Որոշակի լրացուցիչ բարդություններ են ի հայտ գալիս ռուսական ռուբլու ավելի մեծ չափով արժեզրկման պատճառով, քանի որ դա ավելի է թանկացնում մեր էքսպորտը, այն իմաստով, որ ռուսական ռուբլու արժեզրկումը արգելակում է արտահանումը»։
-ԱՄՆ ՄԶԳ «Ֆինանսներ տնտեսական զարգացման համար» ծրագրի կողմից ներկայացված Հայաստանի մարզերում գործող ՓՄՁ-ների համար ֆինանսական միջոցների հասանելիության բարելավման վերաբերյալ իրականացված ուսումնասիրության արդյունքների համաձայն` Հայաստանում, ի տարբերություն այլ երկրների, ֆինանսների մատչելիությունը վատթար վիճակում է: Համամի՞տ եք այս գնահատականի հետ:
-Կախված է նրանից, թե որ երկրների հետ համեմատ: Եթե խոսքը վերաբերվում է արևմտյան զարգացած երկրներին, ապա, այո՛, ավելի վատթար վիճակում է, սակայն, եթե խոսքը վերաբերվում է ԱՊՀ երկրներին, ապա հասանելիությունը մեզ մոտ ավելի լավ վիճակում է:
-Անդրադառնալով փոխարժեքին` կարո՞ղ ենք ասել, որ դոլարի թանկացման շոկն անցավ և հիմա կայուն է վիճակը:
-Դուք արդեն տեսնում եք, որ վիճակը կայուն է, դա կարճատև շոկ էր, որն անցել է, և հիմա վիճակը շուկայում արդեն տեսնում եք, թե ինչպիսին է և կարող եք ըստ այդմ գնահատել:
-Իսկ ինչպիսի՞ զարգացումներ կարող են սպասվել: Կարո՞ղ ենք համարել, որ իրավիճակը Կենտրոնական բանկի վերահսկողության ներքո է, որպեսզի նոր այդպիսի ցնցումներ չլինեն, և որքանո՞վ է հավանական, որ փոխարժեքը կրկին կբարձրանա:
-Մեզ հետ համագործակցող երկրներից ստացվող ազդակները փոփոխական են և շատ դեպքերում`բացասական: Օրինակ` ԵՄ-ում տնտեսական աճը կանխատեսվածից ավելի ցածր է լինելու, Չինաստանում` ըստ Արժույթի միջազգային հիմնադրամի (ԱՄՀ-ի) կանխատեսումների` բացի այն, որ նախորդ տարվա տնտեսական աճը ցածր էր, այս տարի է՛լ ավելի ցածր է սպասվում: Չինաստանը, որը հանքահումքային ռեսուրսների մեծ սպառողներից է շուկայում, ամենամեծ պահանջարկ ներկայացողներից է, դա նշանակում է, որ կա բավականին մեծ ռիսկ, որ մեր հանքահումքային ռեսուրսների միջազգային գները կիջնեն, և հետևաբար մեր ստանալիք հասույթը այդտեղից կարող է պակասել: Վերջապես մեր կարևոր գործընկերներից` Ռուսաստանի հաջորդ տարվա կանխատեսումները խոսում են այն մասին, որ մինչև անգամ 5-5,5 տոկոս տնտեսական անկում է լինելու: Այսինքն` արտաքին շոկերի հավանականությունը պահպանվում է, իսկ մեր խնդիրն է, որ թույլ չտանք, օրինակ, դեկտեմբերի կեսերի խուճապային իրավիճակը: Պետք է ֆինանսական կազմակերպություններն և բնակչությունը կարողանան ավելի լավ պատկերացում ունենալ իրական վիճակի մասին, որովհետև խուճապը` հենց ոչ հստակ պատկերացումից էր առաջացել:
Ամբողջական հոդվածը կարող եք կարդալ այստեղ
