Tert.am-ը գրում է․
ԱԺ նախկին նախագահ, «Հանրապետական» խմբակցության անդամ, մարտիմեկյան դեպքերն ուսումնասիրող ժամանակավոր հանձնաժողովի նախկին նախագահ Սամվել Նիկոյանը, Tert.am-ի հետ զրույցում անդրադառնալով Գյումրիի սպանդին հաջորդած հուզումներին, ասաց, որ երբ ՀՀ քաղաքացիները պահանջում են, որ Հայաստանի պետական մարմինները քննություն իրականացնեն, նպատակը նաև այն է, որ հասարակությունը ցանկանում է հստակ իմանալ հանցագործության դրդապատճառների մասին, ինչպես նաև ունենալ ամբողջական պատկերացում ոճրագործության մանրամասների վերաբերյալ: «Այս հարցն անհանգստացնում է ինչպես մեր հասարակությանը, այնպես էլ ռուս հասարակությանը նպատակով»,-հավելեց նա։
-Այն, ինչ տեղի ունեցավ վերջին մի քանի օրերին, Ձեր կարծիքով, հայ-ռուսական հարաբերություններին ինչ-որ նստվածք չտվե՞ց:
-Կան մտահոգիչ տարրեր, բայց ասել, որ սա կարող է նստվածք թողնել, լարվածություն առաջացնել, ես այդ կարծիքին չեմ: Խնդիրը պետք է ճիշտ ընկալել, ճիշտ հասկանալ և ճիշտ հասկանալու դեպքում, երբ հասկանալի, տրամաբանական լուծումները տրվում են, դա չի կարող ազդել հայ-ռուսական հարաբերությունների վրա: Տեսեք՝ ի՞նչ է կատարվում. ընդամենը Գյումրին և ոչ միայն, ողջ հայ հասարակությունը պահանջում է, որ համաձայն հայ-ռուսական միջպետական համաձայնագրի՝ հանցագործության այն մասով, որը կատարվել է ՀՀ տարածքում՝ սպանության մասով, լինի ՀՀ համապատասխան մարմինների քննության առարկա: Այսինքն՝ քննի մեր քննչական մարմինը և նրան դատի Հայաստանի օրենքներով: Սա է պահանջվում, ուրիշ պահանջ, ըստ էության, դրված չէ: Եթե ըմբռնում լինի նաև ռուսական կողմից, այդ հարցը լուծված կհամարվի։ Լարվածություն և բախումներ հավանաբար չէին լինի, և գյումրեցին կկարողանար այդ վիշտը ավելի հեշտ հաղթահարել: Ուղղակի հայ հասարակությունը պահանջում է արդարություն և պահանջում է նաև իրազեկված լինել, ամենակարևորը: Որովհետև խոսքը նրա մասին է, որ սպանվել է մի ողջ ընտանիք, այդ թվում՝ 2 տարեկան ու 6 ամսական երեխաներ: Հասարակությունը ուզում է հասկանալ և այդ հարցի պատասխանն է ուզում ստանալ, թե ինչպես կարող էր պատանի զինվորը կատարել նման անմարդկային դաժանությամբ հանցագործություն: Եվ այդ պահանջը չի կարող դիտարկվել որպես հակառուսական երևույթ. դիտարկել այդ պահանջները որպես հակառուսական տրամադրությունների արտահայտում, նույնիսկ եթե այն հակասում է... չգիտեմ՝ Ռուսաստանի սահմանադրությանը, չեմ կարծում, որ ճիշտ է:
-Հետևաբար, Դուք ինքներդ համարում եք, որ սա արդարացի՞ պահանջ է:
- Կարծում եմ՝ սա արդարացի պահանջ է, որը, ռուսական կողմից ճկուն մոտեցման դեպքում, կարելի էր շատ հեշտությամբ լուծել, և երբեք նմանատիպ լարված իրավիճակ չէր լինի: Եվ Գյումրին, եթե նայենք, սկսած Ցարական Ռուսաստանից մինչ խորհրդային տարիներ և հիմա, ռուսական զորքերի համար տրադիցիոն դարձած տեղակայման վայր է: Այնտեղ ռուս զինվորը իրեն զգացել է հարգանքով շրջապատված, իսկ Գյումրեցին՝ պաշտպանված: Այսինքն՝ այստեղ դիտարկել որևէ բացասական վերաբերմունք հայ հասարակության կողմից ռուս զինվորի նկատմամբ, բացառում եմ: Եվ այն, որ մեր հասարակությունը, որ միշտ բողոքել է մեր դատաիրավական համակարգից, քննադատել է, պարզվում է՝ իր այս պահանջով հավատում է նրան՝ ասելով, որ մենք ուզում ենք, որ Հայաստանի իրավապահները քննեն այդ գործը և բացահայտեն: Սա լավ է: Լավ է, որ ՀՀ քաղաքացիները խոսում են միջպետական համաձայնագրից և մեր՝ ինքնիշխան պետության դիրքորոշումից: Սրանք շատ դրական պրոցեսներ են, որոնք ևս պետք է հասկանանք:
Ամբողջական հոդվածը կարող եք կարդալ այստեղ
