Երբ բրիտանացի արվեստագետ Լյուկ Ջարեմը հասկացավ, որ հասարակական վայրերում մարդիկ հազվադեպ են միմյանց հետ հաղորդակցվում, նա որոշեց վառ գույներով նկարված դաշնամուրներ տեղադրել հասարակական վայրերում՝ հուսալով, որ դրանք կօգնեն պատահական հաղորդակցություն խթանել անծանոթների միջև։
Արվեստագետը «Նվագիր ինձ, ես քոնն եմ» նախագիծը մեկնարկեց Մեծ Բրիտանիայի Բիրմինգհեմ քաղաքում 2008թ-ին, երբ 15 դաշնամուրներ տեղադրվեցին հասարակական տարբեր վայրերում։ Այս նախագիծը մեծ հաջողություն ունեցավ։ Հաշվարկվեց, որ մոտավորապես 140,000 մարդիկ են նվագել կամ կանգնել ու լսել, թե ինչպես են մյուսները նվագում։
Դրանից հետո ավելի քան 1000 դաշնամուրներ՝ հասարակ «Նվագիր ինձ, ես քոնն եմ» գրառմամբ, տեղադրվել են աշխարհի ավելի քան 37 տարբեր քաղաքներում՝ հասանելի դառնալով 6 միլիոն մարդկանց։