Իսպանական Սևիլիա քաղաքում կյանքի 88–րդ տարում մահացել է Կաետանա Ֆիտց–Ջեյմս Ստյուարտը` բոլորին քաջ հայտնի դքսուհի դե Ալբան։ Եկեք հիշենք այս անկաշկանդ կնոջ` Իսպանիայի ամենահարուստ և տիտղոսակիր արիստոկրատուհու անցած ուղին, ով Ուինսթոն Չերչիլի և արքայադուստր Դիանայի հեռավոր ազգականն էր, ինչպես նաև Պիկասսոյի չկայացած մուսան։
Կաետանա դե Ալբա, ամբողջ Իսպանիայի վաղեմի սիրելին, ով տարբերվում էր շատ այլ տիտղոսակիր ներկայացուցիչներից։ Նա միշտ կոտրում էր կարծրատիպերն ու պայմանականությունները, վայելում էր կյանքը, ֆլամենկո էր պարում և լեռնային դահուկներով սահում։ Մինչև կյանքի վերջին օրերը դքսուհին շարունակում էր ակտիվ կյանք վարել, իսկ տարիքի մասին լրագրողների տված հարցին պատասխանում էր.
–Ես դեռ կհասցնեմ բոլորիդ թաղել։
Ալբա Մարիա դել Ռոսարիո Կաետանա Ալֆոնսա Վիկտորիա Եվգենիա Ֆրանցիսկա Ֆիտց–Ջեյմս Ստյուար–ի–Սիլվան ուներ ավելի շատ տիտղոսներ, քան ինչ որ մեկը ամբողջ աշխարհում։ Նրան էր պատկանում դքսուհու 7, մարկիզուհու 23, կոմսուհու 19 տիտողս։ Սրանք նույնիսկ ավել են Միացյալ Թագավորության թագուհի Ելիզավետա Երկրորդի տիտղոսներից։ Դքսուհու արիստոկրատական դիրքն այնքան բարձր էր, որ նա կարող էր ոտքի չկանգնել թագուհու հետ հանդիպման ժամանակ։
18–րդ դքսուհի Ալբան ծնվել էր 1926 թ.–ի մարտի 28–ին, Մադրիդում։ Իր ամբողջ կյանքի ընթացքում նա տեսել է Երկրորդ Համաշխարհային և Իսպանիայի քաղաքացիական պատերազմներ։
1948 թ.–ին ամուսնացավ դուքս Սոտոմայոր Լուիս Մարտինես դե Իրուխո–ի–Արտասկասի հետ, որից 6 երեխա ունեցավ։
Երիտասարդ տարիքում Կաետանան բարեհամբույր կին էր, ով վայելում էր հասարակության սերն ու հարգանքը, և իրեն շրջապատում էր այնպիսի մարդկանցով, ինչպիսիք Պիկասսոն ու Ժակլին Քենեդին էին։
Դքսուհու առաջին ամուսինը մահացավ 1972 թ–ին և 6 տարի անց նա նորից ամուսնացավ, այս անգամ Իսպանիայի Մշակույթի նախարարության երաժտության բաժնի տնօրենի հետ, ում հետ ապրեց մինչև 2001 թ.–ը, մինչ նորից չայրիացավ։
Դքսուհուն իր հայրենիքում շատ էին սիրում։ Այն աստիճան, որ Սևիլիայում նրա արձանը կանգնեցրեցին։ Այդպիսով նա դարձավ միակ իսպանուհին, ում կենդանության օրոք արձան կանգնեցրեցին։
Ենթադրվում էր, որ իսպանական ավանդական պարերը նրանից լավ ոչ ոք չէր կարողանում պարել։ Իզուր չէ, որ նա պարգևատրվել է «Mof & Art»` ֆլամենկոյի և պարային արվեստի մեջ ունեցած ներդրման համար։ Վերջին անգամ նա պարեց իր 3–րդ հարսանիքի ժամանակ` 85 տարեկան հասակում։
Ալբայի երրորդ ընտրյալը 62–ամյա Ալֆոնսո Դիեսն էր, ով ոչ մի տիտղոս չուներ, ինչը քննարկումների և դժգոհությունների առիթ հանդիսացավ։ Հանուն նրա դքսուհին հրաժավեց իր կարողության մեծ մասից, մի քանի պալատներից և Գոյայի ու Ռուբենսի որոշ նկարներից։
Չնայած տարիքին և անհաջող պլաստիկ վիրահատություններին, դքսուհին միշտ իրեն պահում էր այնպես, ինչպես իրեն էր դուր գալիս։ Մինչև կյանքի վերջին օրերը նա չէր դադարում զարմացնել լրագրողներին` իր էքսցենտրիկ հագուստներով ու արտահայտիչ զարդերով։
2014 թ.–ին, 88 տարեկան հասակում ահա այս տեսքով նա ներկայացավ հարսանիքիներից մեկին։
Անցած շաբաթ դքսուհին հոսպիտալացվել էր սրտային անբավարարության ախտանիշով։ Նա բուժման կուրսեր էր անցնում Sagrado Corazon կլինիկայում, որտեղ և մահացավ նոյեմբերի 20–ին։
Դքսուհի դե Ալբան հիրավի համարվում է լեգենդար կին, ով անցավ կյանքի բոլոր դժվարությունների միջով և խոր ծերության նորից գտավ իր երջանկությունը, թողեց ամեն ինչ` հանուն իր սիրելի տղամարդու։