Աչքի անցկացնելով տարբեր երկրների փրկարարական ծառայությունների զեկույցները՝ մենք առանձնացրել ենք ուշագրավ պատմություններ, որոնցում մարդիկ հայտնվել են վտանգավոր իրավիճակներում ոչ միայն հանգամանքների բերումով, այլև սեփական հիմարության ու անզգուշության պատճառով։
Իսկ տատիկն ո՞ւր է
Չինական Ցզիլին նահանգի մի 87-ամյա տատիկ սովորականի պես առավոտյան զբոսնում էր, երբ հանկարծ ընկավ ջրհորը։ Հետագայում փրկարարները բացատրեցին, որ վերջերս ջրհորի մտոցը (լյուկ) փոխվել էր, սակայն ճշգրիտ չափագրում չէր կատարվել, և նոր մտոցը պետք եղածից ավելի փոքր էր։ Հենց այդ պատճառով էլ Վան Լու անունով տատիկն ընկել էր մտոցի մեջ։ Լավ է, որ ամուսնուն էլ հետը չէր քաշել. նրանք երկուսով էին զբոսնում և ընկնելիս իրար ձեռք բռնած էին։ Ամուսինը փրկարարներ կանչեց և նրանց ջանքերով հնարավոր եղավ կնոջը դուրս բերել մտոցից։
Եթե դա պատահի քեզ հետ
Սովորաբար այսպիսի դեպքերում մարդիկ փրկվում են բջջային հեռախոսների շնորհիվ։ Եթե կապ կա, վտանգի մեջ հայտնված մարդը կարող է զանգահարել Արտակարգ իրավիճակների ծառայություն։ Անցորդները ևս կարող են օգնություն ցույց տալ Ձեզ, եթե լսեն Ձեր օգնության կանչերը։
Ճաղերի արանքում լռված երեխան
Մինչ մայրիկն աշխատում էր, նրա հնգամյա որդին ձանձրանում էր։ Ձանձրույթը հաղթահարելու համար նա ցանկացավ դուրս գալ բակ ու խաղալ ըկերների հետ։ Դուռը փակ էր, սակայն չարաճճի փոքրիկը չհանձնվեց։ Նա որոշեց դուրս գալ լուսամուտից։ Տղայի փոքրիկ մարմինը հանգիստ անցավ ճաղերի միջով, սակայն նրա գլուխը լռվեց ճաղերի մեջ։
Անգամ փրկարարներին չհաջողվեց դուրս բերել նրա գլուխը։ Դրա համար էլ նրա մարմինը հրեցին դեպի ներս։
Եթե դա պատահի քեզ հետ
Խուճապի մեջ ընկնելով՝ մարդիկ միայն մի ուղղությամբ են մտածում ու նեղ իրավիճակից դուրս գալու միայն մի ելք տեսնում։ Փորձի՛ր ոչ միայն առաջ շարժվել, այլև հարկ եղած դեպքում նահանջել։ Հա, մեկ էլ քեզ հնգամյա երեխայի պես մի՛ պահիր, թե չէ փորձանքներն անպակաս կլինեն։
Տղամարդ, ով մեքենայով հայտնվեց հեղեղաջրերում
Բրիտանացի Գրեմ Նենսին մեքենայով դուրս եկավ Տրիդվորս-ռոուդ, որը դրանից մի օր առաջ լցվել էր հեղեղաջրերով։ Թեպետ այնտեղ ցուցանակի վրա գրված էր, որ այդ վայրում ջրի մակարդակը հասնում է մոտ 2 մետրի, դա հետ չպահեց ղեկին նստած անվեհեր Գրեմին։ Գրեմի բախտը բերեց, որ մոտակայքում գտնվում էր ոստիկան Դևիդ Կվատերմանը, ով լողալ գիտեր։
Եթե դա պատահի քեզ հետ
Մինչ ջուրը հասնում է ապակիների բարձրությանը, փորձի՛ր խուճապի չմատնվել ու հանվի՛ր։ Հետո բաց կամ կոտրիր պատուհանը (ջրի ճնշումը դժվար թե թույլ տա բացել դուռը) և լողալով հասի՛ր ցամաք։ Եթե լողալ չգիտես, բարձրացի՛ր ավտոմեքենայի վրա։
Համարձակ չինուհու ձախողումը
Շանդուն նահանգի տեսարժան ապառաժոտ վայրերով զբոսնելիս համարձակ չինուհին որոշեց փորձել սեփական ճկունությունը։ Առանց որևէ ալպինիստական հարմարանքի նա որոշեեց բարձրանալ ժայռի վրա, սակայն կես ճանապարհին նա հանձնվեց։ Նրան փրկարաներն օգնեցին ավարտին հասցնել իր «սխրագործությունը»։
Ի դեպ, նրանք պիցցայի առաքիչից էլ շուտ տեղ հասան։ Չինացի աղջիկն ընդամենը 20 րոպե ստիպված եղավ սպասել նրանց։
Եթե սա պատահի քեզ հետ
Եթե բջջային հեռախոս չկա մոտդ կամ դրա մարտկոցը նստած է, այնպիսի դիրք ընդունիր, որպեսզի շատ չծանրաբեռնես ոտքերդ և տեսանելի լինես. հնարավոր է, որ քեզ արդեն որոնելիս լինեն կամ պարզապես հեռվից նշմարելով՝ օգնության հասնեն։ Բարձր գոռալով օգնության կանչիր միայն հետիոտներին, իսկ ինքնաթիռներ տեսնելով՝ ձեռքերդ թափահարիր օդում։ Մեքենաներից օգնություն կանչելու համար մանր քարեր նետիր դրանց վրա։
Անմոռանալի գնումներ
Երեք տարեկան Սյաո Վեյը Չինաստանի Ֆուցզյան նահանգից է։ Նա մայրիկի հետ գնաց գնումների, սկայն ինչպես ցանկացած տղամարդու, այնպես էլ փոքրիկ Սյաոյին շոփինգը ձանձրալի զբաղմունք թվաց։ Հերթական անգամ ուսումնասիրելով շրջակայքը՝ նա քնեց։ Փոքրիկի ոտքը մնացել էր խանութի դռան ու պատի արանքում։ Չնկատելով երեխային՝ պանութի այցելուներից մեկը կտրուկ հրեց դուռը։ Այստեղ նույնպես առանց փրկարարների օգնության գործը գլուխ չեկավ։ Միայն նրանց ջանքերով հնարավոր եղավ ազատել երեխայի ոտքը։
Եթե դա պատահի քեզ հետ
Պարզապես անուշադրության մի՛ մատնիր երեխաներին, որքան էլ որ տարված լինես գնումներով։
Լոգանք կոյուղաջրում
Ահա և այն բանի ապացույցը, որ մոսկովյան ջրհորները ոչնչով չեն զիջում չինականներին։ Մի 36-ամյա կին ընկավ այդ ջրհորներից մեկի մեջ։ Մի ամբողջ ժամ փրկարարները փորձում էին դուրս բերել նրան այնտեղից, սակայն ցամաք հասնելու կես ճանապարհին պարանը պոկվեց, և կինն ընկավ կոյուղաջրի մեջ։ Եվս մեկ ժամ անց «Мосводоканал» ընկերության աշխատակիցները պարզեցին, որ կոյուղու կոլեկտորը (հավաքիչ) տվյալ վայրից մի կիլոմետր հեռու է տարել կնոջը։ Կնոջը ստորջրյա ջրհորից հանելու համար փրկարարներին հատուկ մեքենա պետք եկավ։ Նրանք հինգ ժամվա տքնաջան աշխատանքից հետո միայն կարողացան դուրս բերել կնոջը կոյուղուց։
Եթե դա պատահի քեզ հետ
Ոչ ոք ապահովագրված չէ բաց ջրհորներից։ Այնտեղ հայտնվելու դեպքում պետք է փորձել կառչել ճաղերից կամ պատերի ելուստներից։ Այդ դեպքում ջրի հոսանքը չի քշի տանի քեզ, իսկ փրկարարներին ավելի հեշտ կլինի դուրս բերել քեզ այնտեղից։
Դատարկ գանձապահարանի թալանը
Այս պատմության մեջ ամենածիծաղելին այն չէ, որ գողի ձեռքը լռվել էր Չինաստանի Հուբեյ նահանգի Ագրարային ինստիտուտի գանձապահարանում և ոչ էլ այն, որ գողի հանցակիցները փախան՝ իմանալով այս չնախատեսված պատահարի մասին, այլ այն, որ գանձապահարանը դատարկ էր։ Գողի ձեռքը գանձապահարանից դուրս բերելու համար փրկարարներից 40 րոպե պահանջվեց։
Եթե դա պատահի քեզ հետ
Ցանկացած անհյուրընկալ նեղ անցքի մեջ լռվելու դեպքում մի՛ փորձիր ձեռքդ զոռով դուրս հանել։ Այն միայն կայտուցվի դրանից և գործը հաստատ գլուխ չի գա առանց փրկարարների։ Փոխարենը խնդրի՛ր ինչ-որ մեկին մի լավ օճառել մաշկդ ու անցքի եզրերը։ Հնարավոր է, որ այդ դեպքում հաջողվի ազատել ձեռքդ։
