Շքեղության մոլուցքը հաճախ տարօրինակ դրսևորումներ է ստանում։ Մեծահարուստները, ովքեր արդար կամ անարդար միջոցներով հսկայական ունեցվածք են դիզել, իրենք իրենց Միդաս արքա են երևակայում ու փորձում ոսկու վերածել այն ամենը, ինչի կդիպչեն։ Ու այսպես ստեղծվում են ոսկե հեռախոսներ, ոսկե ֆոտոխցիկներ ու ոսկե ավտոմեքենաներ։
Ոսկե ֆոտոցիկ «Nikon» ընկերությունից
«Brikk» ընկերությունը թողարկել է ֆոտոխցիկ այն մարդկանց համար, ովքեր վերջնականապես որոշել են ձեռք բերել «Nikon» և «Canon» ընկերությունների լուսանկարչական տեխնիկան։ Այս ֆոտոխցիկը 30.000 դոլար արժե։ Սա հասարակ «Nikon DF» ֆոտոխցիկ չէ։ «Brikk» ընկերության աշխատակիցները պատել են դրա օբյեկտիվը բարձրակարգ ոսկու հաստ շերտով՝ այս կերպ հասարակ լուսանկարչական ապարատը վերածելով թանկարժեք աքսեսուարի։ Անշուշտ, այս ֆոտոխցիկով չարժե դուրս գալ բողոքի ցույցեր լուսաբանելու։ Այս ոսկեզօծ ֆոտոխցիկը հատուկ առիթների համար է ստեղծված։
Ոսկե սմարթֆոն Samsung Galaxy S4
Երկար ժամանակ միլիարդատերերի շրջանում ամենից ավելի հարգի էին համարվում «Vertu» ընկերության բջջային հեռախոսները։ Սակայն հիմա դրանք արդեն զիջել են իրենց դիրքերը «Apple»-ի և «Samsung»-ի սմարթֆոններին։ Մեծահարուստները հասկացան, որ «Vertu»-ի սահմանափակ ֆունկցիոնալ հնարավորություններով հեռախոսների փոխարեն կարելի է օգտագործել բազմաֆունկցիոնալ սմարթֆոններ, որոնք մասնագետների հմուտ ձեռքով վերածվել են ոսկերչական զարդերի և արվեստի ստեղծագործությունների։
Օրինակ՝ «GoldGenie» ընկերության աշխատակիցները Samsung Galaxy S4 սմարթֆոնը պատել են ոսկու շերտով, ինչից հետո այս ոսկեզօծ հեռախոսը սկսել է վաճառվել 2600 դոլարով։
Ոսկե ականջակալներ
Ասում են, որ լռությունը ոսկի է։ Այս ասույթը հավանաբար վերաբերում է «Gold Layla Headphones» կոչվող կանացի ականջակալներին, որոնք ստիպում են աղջիկներին տարվել երաժշտությամբ ու գոնե մի որոշ ժամանակ լուռ մնալ։
Այս ականջակալների ստեղծողները նշում են, որ իրենց ստեղծագործությունը վերափոխում է մարդկանց պատկերացումները ակնեղենի մասին։ Հիմա ոսկյա զարդ կարող են համարվել ոսկեզօծ ականջակալները, մազակալները և մի շարք այլ իրեր, որոնք մենք ամեն օր օգտագործում ենք մեր կենցաղում։ Այս ականջակալները 200 դոլար արժեն։
Ոսկե կոնսոլ «Nintendo Wii»՝ նախատեսված Բրիտանիայի թագավորական ընտանիքի համար
21-րդ դարի առաջին տասնամյակի ավարտին «Nintendo Wii»-ն եղել է աշխարհի ամենահայտնի խաղային կոնսոլը։ Դրանում որոշակի ավանդ ունի նաև հախուռն գովազդային քարոզարշավը, որը տարվում էր այս արտադրանքի մասսայական լայն սպառումն ապահովելու համար։
Այդ կոնսոլի հատուկ տեսակը թողարկվել է Բրիտանիայի թագավորական ընտանիքի համար։ «Royal Wii»-ն մյուս կոնսոլներից տարբերվում է բարձրակարգ ոսկու շերտով, որով պատված է նրա ողջ մակերեսը։
Սփրեյ ուտելի ոսկուց
Որոշ հարուստ մարդիկ այնքան են խելքները թռցրել, որ ցավում են, որ չեն կարող ուտել ոսկին։ Շտապենք մխիթարել նրանց։ Իրականում գոյություն ունի ուտելի ոսկի։ Վերջրս վաճառքի հանվեց մի սփրեյ, որի միջոցով կարելի է հեղուկ ոսկի ցանել սննդամթերքի վրա։ Ընդ որում, բառիս բուն իմաստով ոսկեզօծ մթերքի օգտագործումը միանգամայն անվտանգ է առողջության համար։
Esslack Food Spray-ը ցանում են պատրաստի ճաշատեսակների վրա։ Սփրեյի պարունակության մեջ մի քիչ ոսկի կամ արծաթ է լինում։ Սփրեյի օգտագործումից հետո բոլոր մթերքները մի քանի անգամ ավելի թանկ գին ու ավելի ճոխ տեսք են ստանում։
«DeLafee» ընկերության արտադրության ոսկե շոկոլադներ
Շվեյցարական «DeLafee» ընկերությունը շոկոլադի ու թանկարժեք իրերի գիտակ է։ Նրանք այս երկուսը զուգակցել են իրենց արտադրանքներից մեկում։ «DeLafee»-ն թողարկում է կոնֆետներ՝ պատված ուտելի ոսկու բարակ շերտով։ Այս նորամուծության շնորհիվ «DeLafee»-ի կոնֆետներն անհամեմատ ավելի թանկ արժեն, քան այլ հրուշակեղենի գործարանների արտադրանքը։ 4 ոսկե կոնֆետով լի տուփը 150 դոլար արժե։
«DeLafee»-ն արտադրում է նաև ոսկե սառնաշաքարներ։
Golden Gatti. Ոսկեզօծ «Bugatti» ավտոմեքենա
«Bugatti Veyron» ավտոմեքենան շատ հեղինակավոր ու թանկարժեք մեքենա է։ Բոլորը չէ, որ կարող են իրենց թույլ տալ գնել այսպիսի թանկարժեք մեքենա։ Մինչդեռ ամերիկացի հատնի ռեփեր Flo-Rida-ն որոշեց առանց այն էլ թանկարժեք ավտոմեքենան էլ ավելի թանկարժեք դարձնել։ Նա ավտոմեքենաների տյունինգով զբաղվող «Metro Wrapz» ընկերության աշխատակիցներին պատվիրեց իր սովորական «Bugatti Veyron»-ը պատել ոսկով։ Այս ոսկեզօծ ավտոմեքենան հետագայում անվանեցին «Golden Gatti»։
Ոսկեզօծ iPhone 5s
Բրիտանական «Goldstrike» ընկերությունն արդեն որոշ ժամանակ է, ինչ մասնագիտացել է հասարակ իրերը ոսկյա զարդերի վերածելու գործում։ Ոչ մի հահտնի սարք չի վրիպել այս ընկերության ուշադրությունից։ Եթե այս կամ այն հեռախոսը լայն սպառում ունի, կգտնվեն մարդիկ, ովքեր կցանկանան իրենց սիրելի հեռախոսը տեսնել թանկարժեք աքսեսուարի տեսքով։
«Goldstrike»-ի ամենահաջող աշխատանքներից մեկը iPhone 5s-ի ոսկեզօծումն էր։ Ընկերության աշխատակիցները սմարթֆոնը ոչ միայն բարձրակարգ ոսկու շերտով են պատել, այլև երեք հազար մանր ադամանդներով։ Ադամանդակուռ ոսկեզօծ սմարթֆոնը մոտ 7800 դոլար արժե, սակայն դա այնքան էլ մեծ գումար չէ, եթե հաշվի առնենք, որ այս սմարթֆոնը ոսկե զարդի կարգավիճակ ունի։