Սուշին համարվում է նրբախորտիկ և գնալով ավելի ու ավելի լայն տարածում է ստանում, սակայն սուշիի օգտագործումը կարող է առողջական լուրջ խնդիրների հանգեցնել։
Մի չինացի տղամարդ շատ էր սիրում սաշիմի, սակայն նրա սերն այս կերակրատեսակի նկատմամբ ոչ մի լավ բանի չհանգեցրեց։ Տղամարդը դիմեց բժշկի՝ գանագատվելով ստամոքսի ցավից ու մաշկային քորից։ Տղամարդը սարսափած էր, երբ սկանավորում անցնելուց հետո իմացավ, որ երիզորդ տեսակի որդերը տարածվել էին իր ողջ օրգանիզմով մեկ։ Պատճառը սաշիմիի՝ հում ձկան չարաշահումն էր։
Բժիշկները կարծում են, որ սաշիմին պատրաստված է եղել աղտոտված մթերքից։ Տղամարդը բուժման կուրս անցավ Չինաստանի արևելքում տեղակայված հիվանդանոցներից մեկում։ Հետազոտությունները ցույց են տվել, որ հում կամ կիսաեփ ձկան օգտագործումը կարող է մի շարք պարազիտային վարակների պատճառ հանդիսանալ։
Երիզորդների վարակները առաջանում են «diphyllobothrium»-ի թրթուրներն ուտելու պատճառով։ Այդ թրթուրները հանդիպում են քաղցրահամ ջրերի ձկների (օրինակ՝ սաղմոնի) մեջ, թեպետ մարինացված ու ծխեցված ձկները ևս կարող են ճիճվակրության պատճառ դառնալ։ Հում ձկան օգտագործման պատճառով ճիճվակրություն ստանալու դեպքերն աճել են ինչպես աղքատ, այնպես էլ համեմատաբար զարգացած երկրներում։
«Canadian Family Physician» ամսագրում հրատարակված հետազոտության մեջ նշված է, որ դրան նպաստում է սուշիի և սաշիմիի լայն տարածումը, սակայն հում ձկով պատրաստվող այլ հայտնի կերակրատեսակները՝ հում ձկան աղ դրած կամ մարինացված ֆիլեները, հում սաղմոնը և չևիչեն նույնպես կարող են ճիճվակրության պատճառ դառնալ։ Չինացի բժիշկ Յինը հայտնել է, որ երիզորդի որդերով աղտոտված հում մթերքի օգտագործումը կարող է ի վերջո ցիստիզերկոզի պատճառ դառնալ, երբ հասուն որդերը մուտք գործեն մարդու արյան մեջ։ Այս տեսակի վարակը վտանգ է սպառնում մարդու կյանքին և կարող է մահվան հանգեցնել, եթե այն ախտահարի ուղեղը։
