Ըստ ամերիկացի գիտնակնների՝ էլեկտրոնային ծխախոտները կարող են ավելի շատ թունանյութեր պարունակել, քան հասարակ ծխախոտները: Հարավային Կարոլինայի գիտնականները պարզել են, որ գոլորշին պարունակում է քրոմ թունանյութը, որը բացակայում է ավանդական ծխախոտում: Էլեկտրոնային ծխախոտում ավելի շատ նիկել կա, քան ավանդական ծխախոտում: Էլեկտրոնային ծխախոտները պարունակում են նաև արճիճ, ցինկ և այլ թունանյութեր, թեպետ դրանք ավելի քիչ են, քան ավանդական ծխախոտներում: Հարավային Կարոլինայի պրոֆեսոր Կոնստանտինոս Սիուտասը ասել է, որ էլ. ծխախոտներում պարունակվող թունավոր մետաղների բարձր մակարդակը մտահոգիչ է: Այնուամենայնիվ, նրա կողմից իրականացված հետազոտության արդյունքներից պարզ է դարձել, որ էլ. ծխախոտները ավանդական ծխախոտներից պակաս վտանգավոր են:
Հետազոտության հեղինակ Արիան Սաֆարին ասել է.
Մետաղական մասնիկները հավանաբար առաջանում են էլեկտրոնային ծխախոտների քարտրիջներից: Սա նշանակում է, որ հնարավոր է, որ ավելի լավ արտադրական գործընթացների շնորհիվ հնարավոր լինի նվազեցնել ծխի մեջ առկա մետաղների քանակը:
Նա հավելել է, որ նմանատիպ հետազոտություններն անհրաժեշտ են արդյունավետ կանոնակարգող միջոցառումներ ձեռնարկելու համար: Էլեկտրոնային ծխախոտները միայն վերջերս են տարածում ստացել, ինչի պատճառով էլ դրանց մասին շատ հետազոտություններ չկան:
Այս հետազոտության շրջանակներում կատարված բոլոր գիտափորձերն անցկացվել են գրասենյակներում ու սենյակներում: Մինչ հետազոտության կամավոր մասնակիցներն ավանդական ծխախոտ և էլ. ծխախոտ էին ծխում, գիտնականները հավաքում էին սենյակի օդում հայտնաբերված մասնիկները և հետազոտում հավաքված նմուշների քիմիական բաղադրությունը և աղբյուրները: Ոչ թե լաբորատորիաները, այլ գրասենյակներն ու սենյակներն են այն վայրերը, որտեղ Դուք կարող եք շնչել ինչ-որ մեկի ծխած ծխախոտի ծուխը: Այսպիսով, հետազոտությունն իրականացվեց այդ վայրերում:
Հետազոտությունն իրականացվել է Առողջապահության համաշխարհային կազմակերպության մի զեկույցից հետո: Զեկույցում նշվում էր,որ էլ. ծխախոտի օգտագործումը ոչ բացօթյա տարածքներում պետք է արգելվի, իսկ դրա գովազդը պետք է դադարեցվի, քանի դեռ չի ներկայացվել համոզիչ գիտական ապացույց ծխախոտի անվտանգության մասին: Մեծ նշանակություն տալով զեկույցին՝ Բրիտանական առողջապահական ասոցիացիայի աշխատակից Ռամ Մորֆը կոչ է արել կանոնակարգում մտցնել էլ. ծխախոտների արտադրության և վաճառքի ոլորտում: Նա հայտնել է «Forbes»-ին, որ խիստ վերահսկողություն է հարկավոր, որպեսզի իբրև թիրախային սպառողական խումբ չընտրվի երիտասարդությունը: Նա մասնավորապես նշել է.
Էլ. ծխախոտների վաճառքով զբաղվող ընկերությունների յուրաքանչյուր պնդումը պետք է հիմնավորվի ճշգրիտ գիտական ապացույցներով: Անհրաժեշտ է, որպեսզի սպառողը լիարժեք կերպով տեղեկացված լինի էլ. ծխախոտների առավելությունների և վտանգների մասին:
Անգլիայում վաճառված էլ. ծխախոտների մեջ հայտնաբերվել է դիացետիլ քիմիական նյութը: Եթե մարդ շնչի այս նյութը, այն կարող է լուրջ թոքային հիվանդությունների առաջացման պատճառ հանդիսանալ: Դիացետիլն օգտագործվում է հեղուկ թութունին բույր հաղորդելու համար: Այն անվնաս է ուտելու համար, սակայն այն շնչելու դեպքում, կարող է առաջանալ կոնստրիկտիվ բրոնխիտ հիվանդությունը: Սա շատ ծանր հիվանդություն է, որը խազում է թոքերը և խոչընդոտում բնականոն շնչառությունը: Անգլիայում վաճառված վերոնշյալ էլ. ծխախոտներն արտադրվում էին VIP ընկերության կողմից, սակայն BBC-ի իրականացրած հետաքննությունից հետո դրանք հանվեցին շրջանառությունից: Բժիշկներն ասում են, որ կոնստրիկտիվ բրոնխիտը երբեմն կարող է այնքան սրվել, որ թոքերի փոխպատվաստման կարիք առաջանա: