Tert.am-ը գրում է.
Մերձմոսկովյան Ալաբինոյում անցկացված տանկային բիաթլոնի աշխարհի առաջնության եզրափակիչ փուլի թիմային մրցումներում երկրորդ տեղը զբաղեցրած Հայաստանի 12 անդամից բաղկացած հավաքականի անդամներ Սանասար Ծառուկյանը, Գոռ Կարապետյանը և Գևորգ Պալոյանը Tert.am-ի հետ զրույցում ներկայացրին իրենց տպավորությունները մրցույթից, սպասելիքներն ու գրանցած արդյունքի շուրջ հայության արձագանքը:
«Չնայած նրան, որ Ադրբեջանը շատ վաղուց է տեսել մեր հնարավորությունները, բայց մենք հնարավորություն տվեցինք թշնամուն մեզ ավելի լավ ճանաչելու և իմանալու, որ գործ ունի մասնագետների հետ»,-ասաց մեխանիկ-վարորդ, շարքային Գոռ Կարապետյանը:
Վերջինիս խոսքով՝ իրենք շատ լավ են վերապատրաստվել են Հայաստանում, բայց ի սկզբանե տեսնելով հակառակորդին՝ մտածել են, որ նրանք ավելի հզոր են: Գոռ Կարապետյանը նաև նշեց, որ առաջին հորիզոնականը զբաղեցրած Ռուսաստանը մրցույթին մասնակցել է ավելի նոր մոդելի տանկով, քան Հայաստանի հավաքականի տանկն էր. «Եվ մեր անձնակազմի շնորհիվ գրավեցինք երկրորդ հորիզոնականը, բայց կարող էինք գրավել նաև առաջին հորիզոնականը»:
Հանգամանքը, որ մրցույթին զուգահեռ իրավիճակը լարված էր հայ-ադրբեջանական սահմանին, Գոռի խոսքով, էլ ավելի պարտավորեցնող էր. «Այս իրավիճակում մեզ համար հաղթանակը շատ ավելի մեծ դեր էր խաղում: Գիտակցում էինք, որ մեզ հետևում է նաև մեր հակառակորդը, չնայած նրան, որ Ադրբեջանը շատ վաղուց է տեսել մեր հնարավորությունները: Պատասխանատվությունն ավելի մեծ էր, քան երբևէ»:
Ցուցաբերած արդյունքների մասին էլ հավաքականի անդամն ասաց, որ բավարար է գնահատում և համոզմունք հայտնեց, որ եթե մրցող տեխնիկաները հավասար հնարավորությունների լինեին, ապա Հայաստանն առաջին հորիզոնականը կգրավեր:
Հավաքականի մեկ այլ անդամ, Երրորդ անձնակազմի նշանառու-օպերատոր, շարքային Սանասար Ծառուկյանն էլ նշեց՝ արդյունքները սպասելի էին, բայց այդ աստիճանի չէ, որովհետև մրցակիցները շատ ուժեղ էին: «Նրանք ևս շատ պատրաստված էին, մեզնից ավելի փորձառու: Բայց ստացվեց հակառակը, մենք սովորական զինվորներով սկսեցինք իրենցից ավելի շատ բան իմանալ: Այնպես ստացվեց, որ առաջին տեղը ևս կարող էինք զբաղեցնել, բայց մրցակցությունը դժվար էր, հետո մեր տանկն ավելի հին մոդելի էր»,-ասաց նա:
Աբողջական հոդվածը կարող եք կարդալ այստեղ