Կախաղան հանվելուց առաջ իրանցի մարդասպանը փորձում էր մի վերջին անգամ շնչել: Մահապատժի ենթարկվող տղամարդու ոտքերի տակից աթոռիկը մի կողմ պետք է հրեին սպանվածի ծնողները, սակայն վերջին պահին զոհի մայրը մոտենում է մարդասպանին ու ապտակում նրա դեմքին: Նա ներում է շնորհում իր որդու կյանքը խլած հանցագործին՝ խնայելով վերջինիս կյանքը:
Մարդասպանի մայրը վազում ու գրկում է որդու կյանքը խնայած կնոջը:
Զոհի հայրը` Աբդոլղանի Հոսեինզադեհը, պատմել է, որ նրա կինը մտափոխվել ու որդու մարդասպանին ներել է այն բանից հետո, երբ վերջինս որդուն տեսել է երազում: Երազում տղան մորն ասել է, թե լավ վայրում է, ու խնդրել է մորը վրեժխնդիր չլինել: Սակայն ծնողները որոշել էին դեռևս մտածել, ու միայն մահապատժից վայրկյաններ առաջ է զոհի մայրը որոշում խնայել մարդասպանի կյանքը:
Մարդասպանը, ով հայտնի է որպես Բալալ, մահապատժի էր դատապարտվել 18–ամյա Աբդոլա Հոսեինզադեհին Իրանի Ռոյան քաղաքում յոթ տարի առաջ սպանելու համար:
Զոհի հայրը հավատացած է, որ Բալալը չէր ցանկանում սպանել իր տղային, ու միայն դանակը կառավարել չկարողանալով, պատահաբար սպանել է նրան:
Դեռևս պարզ չէ՝ Բալալին ազատություն կշնորհվի, թե ոչ, այնուամենայնիվ, նրա կյանքը խնայվեց՝ որդեկորույս մոր գթասրտության շնորհիվ: