Մեր ժողովուրդը կորցրեց իր ականավոր զավակներից մեկին, ում գործունեությունը դեռ երկար տարիներ կմնա որպես Հայրենիքը սիրելու և Հայրենիքին ծառայելու օրինակ: Փոխանցում ենք մեր անկեղծ ցավակցությունները Վլադիմիր Խոջաբեկյանի հարազատներին և մտերիմներին:

Վ.Ե. Խոջաբեկյանը ծնվել է 1929թ. մարտի 2-ին Հայաստանի Հանրապետության Վարդենիսի շրջանի Խաչաղբյուր գյուղում:
1946թ. ավարտել է Վարդենիսի միջնակարգ դպրոցը:
1954թ. գերազանցության դիպլոմով ավարտել է Երևանի պետական համալսարանի տնտեսագիտական ֆակուլտետը:
1959թ. ավարտել է Երևանի պետական համալսարանի ասպիրանտուրան` տնտեսագիտության գծով:
1963թ. պաշտպանել է տնտեսագիտության թեկնածուի գիտական թեզը:
1975թ. պաշտպանել է դոկտորական ատենախոսությունը և ստացել տնտեսագիտության դոկտորի գիտական աստիճան:
1963թ. ստացել է ավագ գիտաշխատողի, 1977թ.` պրոֆեսորի գիտական կոչումներ:
1982թ. ընտրվել է ՀՀ ԳԱԱ թղթակից անդամ, 1994թ.` ակադեմիկոս:
1999թ. ընտրվել է Ազգային անվտանգության պրոբլեմների գծով գիտությունների միջազգային ակադեմիայի ակադեմիկոս:
ՎԼԱԴԻՄԻՐ ԵՂԻՇԻ ԽՈՋԱԲԵԿՅԱՆԸ եղել է`
1974թ-ից Հայկական հանրագիտարանի բոլոր հատորների տնտեսագիտության գիտաճյուղային խորհրդի անդամ:
1980-1991թթ. ԽՍՀՄ Գիտությունների ակադեմիայի տնտեսագիտության ինստիտուտի ժողովրդագրության և աշխատանքային ռեսուրսների հիմնահարցերի խորհրդի անդամ:
1985-1993թթ. ՙԳիտելիք՚ ընկերության նախագահի տեղակալ:
1991-2002թթ. ՀՀ կառավարությանն առընթեր Միգրացիայի և փախստականների վարչությանը կից մասնագիտական խորհրդի անդամ:
ՀՀ ԳԱԱ հումանիտար բաժանմունքի փիլիսոփայության, տնտեսագիտության և իրավագիտության պրոբլեմային խորհրդի նախագահ:
1960 թվականից մինչ օրս աշխատում էր ՀՀ ԳԱԱ տնտեսագիտության ինստիտուտում` զբաղեցնելով ինստիտուտի գիտական քարտուղարի, ժողովրդագրության և աշխատանքային ռեսուրսների բաժնի վարիչի, փոխտնօրենի, տնօրենի պաշտոնները:
Վ.Ե. Խոջաբեկյանը շուրջ կես դար դասավանդել է Հանրապետության առաջատար բարձրագույն ուսումնական հաստատություններում:
Ակադեմիկոսը համարվում է Հայաստանում Ժողովրդագրության և աշխատանքային ռեսուրսների գիտական ուղղության դպրոցի հիմնադիրը:
Գիտության բնագավառում ձեռք բերած ակնառու նվաճումների համար անվանի Ակադեմիկոսը`
1979թ.զետեղվել է Հայաստանի Հանրագիտարանի 5-րդ և 1995թ. Հայաստանի համառոտ հանրագիտարանի 2-րդ հատորներում, 2000թ. Ամերիկյան կենսագրական ինստիտուտի բառարանում:
1999թ. արժանացել է Ամերիկյան կենսագրական ինստիտուտի կողմից ՙ1998 թվականի Տարվա մարդ՚ կոչմանը:
2003թ. պարգևատրվել է ՙՄովսես Խորենացի՚ մեդալով:
2009թ. պարգևատրվել է Հայաստանի պետական տնտեսագիտական համալսարանի ոսկե շքանշանով:
Վ.Ե. Խոջաբեկյանը շուրջ 400 գիտական աշխատությունների, այդ թվում` մոտ 2 տասնյակ մենագրությունների, հարյուրավոր հոդվածների և գիտական զեկույցների հեղինակ էր: Նա հայկական, ռուսական, ինչպես նաև արտասահմանյան մի շարք հեղինակավոր և լայն ճանաչում ունեցող ամսագրերի խմբագրական գիտական խորհրդի անդամ էր: Այսօր դժվար է գնահատել անվանի Ակադեմիկոսի ավանդը, հայ տնտեսագիտական մտքի զարգացմանը բերած նրա վաստակը, հայ մտավորականի վառ կերպարը, ով անմնացորդ նվիրվեց գիտությանը, հայրենիքին...

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել