Newsbook.am-ը գրում է.

Գաղտնիք չէ, որ Մարտի 8-ը, Ապրիլի 7-ը, ինչպես նաև արդեն մեր տոների ու ծեսերի մեջ մտած մեռելոցները ծաղկավաճառների համար բարեբեր ժամանակներ են: Այդ օրերին եռակի-քառակի անգամ թանկանում են ծաղիկների սակագները, ու մարդիկ ստիպված են լինում վճարել պահանջված գումարը՝ օրն իմաստավորելու և արժևորելու համար: Դեռ երեկ մայրաքաղաքի ծաղկավաճառները սպասման մեջ էին: Օրվա երկրորդ կեսին քաղաքի կենտրոնական հատվածներում, որտեղ ծաղկի վաճառքի ավանդական կետերն են, արձանագրվեցին գների թռիչքներ՝ ամենասովորական փնջերի նվազագույն գները սկսելով 5 հազար դրամից: Ինչպես մեզ տեղեկացրեցին Ամիրյան, Թումանյան, Մոսկովյան փողոցներում և բժշկական համալսարանի գետնանցումում գտնվող ծաղկի վաճառակետերից, իրենց սպասումներն ի դերև են ելել, որովհետև օրվա վերջին չափազանց քիչ է եղել եկամուտը, վաճառվել է նվազագույն քանակության ծաղիկ: Այսօր առավոտվանից էլ ինչպես նշյալ կետերում, այնպես էլ Բաղրամյան, Կոմիտաս, Տիգրան Մեծ փողոցներում գտնվող ծաղկի վաճառակետերում մարդիկ գներն են հարցրել, նայել ցուցադրվող ծաղիկներին ու հեռացել: Իհարկե, մեր կանայք առանց ծաղիկ չեն մնացել. շատերը գերադասել են դաշտային ծաղիկները, փոքրիկ թաղարները, որոնք շատ ավելի մատչելի են: Ծաղկավաճառների «գործին խփել» է նաև քաղաքապետարանը, որը, ավանդույթի համաձայն, մի շարք կենտրոնական փողոցներում ծաղիկներ է բաժանել կանանց: Մեզ հետ զրուցած շատ քաղաքացիներ իրենց զայրույթը հայտնեցին այն առթիվ, որ ծաղկավաճառները կորցրել են չափի զգացումը, սահմանել գներ, որոնք որևէ կապ չունեն իրատեսության հետ: Եվ հենց սահմանված գներն էլ խոչընդոտել են ծաղկի վաճառքին: Ի դեպ, Հայաստանում ամեն ինչ հակառակն է արվում: Ողջ աշխարհում Ծննդյան տոների ժամանակ էժանացվում են գները, գների իջեցում է կատարվում նաև Վալենտինի, Կանանց օրերի ժամանակ, մինչդեռ Հայաստանում կատարվում է հակառակը։ Ու հենց աչքածակության պատճառով էլ տուժում են ծաղկավաճառները, որովհետև վաղն արդեն այդ ծաղիկները կորցրած կլինեն իրենց տեսքը, թարմությունը, ու գնորդներ էլ չեն լինի։

Մ. Լևոնյան

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել