Ողջույն, իմ ոճային ընթերցողներ: FashionYan-ում այսուհետ նոր բաժին է գործում` «Աստղային ոճ», որտեղ փորձելու եմ վերլուծել հայ հայտնիների ոճը: Շարքն ուզում եմ սկսել` ներկայացնելով երիտասարդ մի աղջկա` դերասանուհի Շուշաննա Թովմասյանին: Կփորձեմ տարբեր վայրերում ներկայացված նրա կերպարներով եւ սոցցանցերում հրապարակած լուսանկարներով առանձնացնել նրա ոճին հատուկ տարրերը:
Ասել, որ Շուշաննան ընդգծված կամ հատուկ ոճ ունի, սխալ կլինի: Նրա ոճը կարելի է բնութագրել որպես սովորական երիտասարդ աղջկա ոճ, որը ժամանակ առ ժամանակ լրացվում է երեկոյան շքեղ զգեստներով եւ սանրվածքներով:
Ըստ իս, Շուշաննան իր հագուկապով լավագույնս «քարոզում» է այն, ինչ այս տարիքի աղջիկները պետք է կրեն. երիտասարդական, գունեղ, թեթեւ եւ, կարեւորը, իր տարիքին համապատասխան հագուստ:
Ի տարբերություն իր տարիքի ճանաչված շատ այլ հայտնիների՝ Շուշաննա Թովմասյանը չի ընդօրինակում նորաձեւության արհեստական եւ շաբլոն միտումները` հաստացրած հոնքեր, միաժամանակ մի քանի երանգի վարսեր, աբստրակտ կտրվածքներ կամ սանրվածքներ, ուռացրած շրթունքներ, գերերկար եղունգներ եւ այլն: Շուշաննայի ոճը, ինչ-որ տեղ, նաեւ համեստ եւ ռոմանտիկ աղջկա ոճ է:
Ստորեւ ներկայացնում եմ Շուշաննայի մի քանի լուսանկար, որոնք եւս փաստում են վերը նշվածը:
