Աղցան` սմբուկով և լոլիկով
Այս ճաշատեսակը կարելի է օգտագործել ինչպես որպես լցոն մսի հետ, այնպես էլ տաք կամ սառը վիճակում:
Անհրաժեշտ է.
Միջին չափի սմբուկ-2-3 հատ
սոխ-2 հատ
ձիթայուղ-60 մլ
քացախ-20 մլ
մեծ լոլիկ- 3 հատ
աղացած սև պղպեղ ¼ թ.գ.
մաղադանոս, համեմ, ռեհան-մի թեյի գդալ
աղ` ըստ ճաշակի
1. Սմբուկները լվանալ և ոչ մեծ շրջանների կտրատել: Կարելի է այն 10-15 րոպե պահել աղաջրի մեջ. տապակելու ժամանակ սմբուկներն ավելի քիչ յուղ կներծծեն: Սոխը կլորակների կտրատել:
2. Սկզբից սմբուկները մինչև ոսկեգույն աստիճանի տապակում ենք ձիթայուղի մեջ, իսկ հետո սոխն ենք տապակում:
3. Տապակած բանջարեղենը դնում ենք ափսեի մեջ, ավելացնում ենք շրջանակներով կտրատված լոլիկները, աղը, բիբարը և քացախ ենք ցանում վրայից: Աղցանի վրա պետք չէ ձիթայուղ ավելացնել. այն միայն հարկավոր է բանջարեղենը տապակելու ժամանակ: Ամբողջը զգուշորեն խառնում ենք:
Պատրաստի աղցանի մեջ հարկավոր է ավելացնել մանր կտրատված մաղադանոս, համեմ և ռեհան:
Քյուֆթա
Այն փափուկ և ցածր կալորիականություն ունեցող ուտեստ է: Համարվում է հայկական խոհանոցի ամենահին ճաշատեսակներից մեկը: Ի սկզբանե միսը լավ ծեծում էին փայտե մուրճով, մինչև որ այն չվերածներ միատարր զանգվածի, որից գունդ էին պատրաստում և եփում:
Ժամանակակից տնային տնտեսուհիները այդքան ժամանակ չունեն և միսը մսաղացով 4-5 անգամ աղում են կամ արդեն գնում են քյուֆթայի համար հատուկ պատրաստի միսը: Բայց եթե ցանկանում եք քյուֆթա պատրաստել ավադական եղանակով, ապա դիմեք պապենական միջոցներին:
Անհրաժեշտ է.
1 կգ անյուղ տավարի կամ հորթի միս
5-6 բաժակ կաթ
2 ձու
2 միջին չափի սոխ
2 թ.գ. աղ
2 թ.գ. ալյուր
50 գ կոնյակ (կարելի է նաև օղի)
հալած յուղ
Պատրաստում ենք ավանդական բաղադրատոմսով
Շատ կարևոր է, որպեսզի միսը լինի շատ թարմ:
1. Մաքրեք տավարի միսը ջիլերից, դրեք պոլիէթիլենային տոպրակի մեջ և այնքան ծեծեք, որպեսզի միսը վերածվի միատարր զանգվածի: Զանգվածը պետք է շատ հարթ ստացվի: Ծեծելու ընթացքում պետք է աստիճանաբար ջուր ավելացվել, որպեսզի զանգվածը էլաստիկ ստացվի: Ապա աղ արեք և շարունակեք ծեծել, մինչև որ միսը բաց գույնի դառնա:
2. Ստացված զանգվածը դրեք մեծ կաթսայի մեջ և ձեռքով 3-4 րոպե խառնեք
3. Ավելացրեք հում ձվեր, մանր կտրատված սոխ, կաթ, ալյուր և կոնյակ (կամ օղի), խառնեք այդ ամբողջ զանգվածը ձեռքերով այնպես, ինչպես խմորը: Լավ խառնելուց է կախված քյուֆթայի հաջող ստացվելը:
4. Ապա մեծ և խորը կաթսայի մեջ ջուր լցրեք, տաքացրեք ջուրը (չեռացնեք) և աղ ավելացրեք:
5. Ստացված մսային զանգվածը 4 մասի բաժանեք, ձեռքերը թրջեք սառը ջրով և յուրաքանչյուր մասին գունդի ձև տվեք:
6. Գնդերը դրեք տաք ջրի մեջ, եռացրեք և պարբերաբար վերցրեք վրայի փրփուրը: Եփեք միջին կրակի վրա` 25-30 րոպե: Ստուգելու համար համեք մի գունդը և կտրեք: Եթե միսը միջից կարմիր չէ, ապա քյուֆթան պատրաստ է: Իսկ եթե դեռ պատրաստ չէ, կտրված գունդը զգուշությամբ ետ դրեք կաթսայի մեջ:
7. Պատրաստի գնդերը 2-3 սմ հաստությամբ կտրատեք, վրայից կարագ դրեք: Քյուֆթայի հետ սովորաբար փլավ են մատուցում կամ շիլա:
Ամառային դոլմա
Դոլման հայկական խոհանոցի ամենաավանդական և սիրված ճաշատեսակներից մեկն է: Ձմռանն այն պատրաստում են կաղամբի կամ խաղողի տերևներից, որոնք հավաքում և սառեցնում են ամռանը, իսկ ամռանը և գարնանը դոլման պատրաստում են բանջարեղենի տարբեր տեսակներից: Աշնանն անպայման օգտագործում են սերկևիլ:
Անհրաժեշտ է.
500 գ տավարի միս
500 գ խոզի միս
6 միջին չափի լոլիկ
4 միջին չափի սմբուկ
5-6 միջին չափի բիբար
3-4 խնձոր
2 սերկևիլ
2 գլուխ սոխ
200 գ համեմ
200 գ մաղադանոս
150 գ ռեհան
150 գ տոմատի մածուկ
1 թեյի գդալ շաքարավազ
1/2 բաժակ կլոր բրինձ
աղ` ըստ ճաշակի
1. Միսը խառնեք սոխի և կանաչեղենի հետ: Ավելացրեք աղ, բիբար, լվացած բրինձ: Ամեն ինչ լավ խառնեք և կես բաժակ եռացած ջուր լցրեք:
2. Սմբուկների միջից հանեք միջուկը, բիբարի վերին մասը կտրեք, սերմերը զգուշորեն մաքրեք, լոլիկների միջուկը հանեք, խնձորը և սերկևիլը երկու կես արեք և նույնպես հանեք միջուկը:
3. Պարտաստված բանջարեղենների մեջ լցրեք միսը: Բիբարները և լոլիկները ծածկեք նրանց կտրված գլխիկներով:
4. Մեծ կաթսայի մեջ սկզբից դրեք սմբուկները, ապա բիբարները, հետո խնձորները սերլևիլի հետ միասին և վերջում լոլիկները:
5. Տոմատի մածուկը բացեք ջրով, աղ արեք և մի փոքր շաքարավազ ավելացրեք: Լցրեք այն դոլմայի վրա, որպեսզի բանջարեղենը ծածկվի: Վրայից տափակ ափսե դրեք և մի փոքր սեղմեք, այնուհետև ծածկեք կաթսան կափարիչով: Եփեք ցածր կրակի վրա` մոտ մեկ ժամ: Դոլման պատրաստ կլինի, երբ եփվի բրինձը:
Քաղցր փլավ
Այսպիսի փլավը հիմնականում պատրաստում են տոների ժամանակ:
Անհրաժեշտ է.
Երկար բրինձ-300 գ
չիր-100 գ
սալոր-100 գ
չամիչ-100 գ
ձիթայուղ -150 գ
բարակ լավաշ-1 հատ
1. Բրինձը կիսաեփ արեք, լվացեք սառը ջրով:
2. Չրերը լվացեք և չորացրեք, թեթևակի տապակեք: Հետո մի փոքր ջուր ավելացրեք և 10-15 րոպե եփեք ցածր կրակի վրա:
3. Խորը կաթսայի մեջ 50 գ յուղ լցրեք, լավաշը մեծ կտորների բաժանեք և դրանցով ծածկեք կաթսայի հատակը: Չրերի կեսը խառնել բրնձի հետ և դրեք լավաշի վրա: Ավելացրեք ևս 50 գ յուղ և փակեք կափարիչը: Եփեք ցածր կրակի վրա` 30 րոպե, մինչև որ բրինձն ամբողջությամբ եփված լինի:
4. Պատրաստի բրինձը չրերի հետ միասին դրեք ափսեի մեջ, կողքից դրեք կարմրացրած լավաշը, իսկ վրայից դրեք մնացած չրերը:
«Նազուկ» թխվածքաբլիթ
Ի՞նչ տոն առանց թխվածքաբլիթի:
Անհրաժեշտ է.
Խմորի համար.
1,5 բաժակ ալյուր
1,4 թ.գ. ակտիվ չոր խմորիչ
1/2 բաժակ թթվասեր
200 գ կարագ
Լցոնի համար.
3/4 բաժակ ալյուր
3/4 բաժակ շաքարավազ
100 գ կարագ
1 թ.գ. վանիլինի էքստրակտ
1/4 թ.բ. մանրացված ընկույզներ
1 դեղնուց
1. Պատրաստում ենք խմորը. Ալյուրը մաղեք խորը տարրայի մեջ, ավելացրեք խմորիչը և խառնեք:
2. Խմորի մեջ ավելարցեք թթվասեր և հարած կարագ: Ձեռքերով լավ խառնում ենք խմորը: Այն չպետք է կպչի ձեռքերին: Պատրաստի խմորը տեղադրում ենք կարագով պատված տարրայի մեջ և ամբողջ գիշեր թողնում ենք սառնարանի մեջ:
3. Պատրաստում ենք լցոնը. տարրայի մեջ խառնում ենք ալյուրը, ձեռքերով խառնում ենք շաքարավազը և կարագը: Ապա ավելացնում ենք վանիլին և մանրացված ընկույզ, և ևս մեկ անգամ խառնում ենք:
4. Խմորը հանում ենք սառնարանից, կիսում ենք երկու մասի, առաջին մասը մի կողմ ենք դնում, իսկ երկրորդը դնում ենք թեթևակի ալրապատ խոհանոցային տախտակի վրա:
5. Բացած խմորի վրա բարակ շերտով քսում ենք լցոնը: Ապա զգուշորեն խմորը ետ ենք փաթաթում: Կիսում ենք ռուլետը 10 հավասար մասերի և դնում ենք դրանք հարթ սկուտեղի մեջ, վրայից դեղնուց քսում: Այս նույն գործողությունները կատարում ենք խմորի մյուս կեսի հետ:
Տաքացնում ենք ջեռոցը մինչև 200 աստիճան և թխվածքաբլիթները եփում ենք մոտ 30 րոպե: Պատրաստի նազուկը դնում ենք տափակ ափսեի մեջ և թողնում ենք, որ սառչի:
Բարի ախորժակ!
