Խոսակցությունների ամենահետաքրքիր ու կարևոր հատվածը միշտ կանգնած է լինում հրաժեշտից երկու քայլ ձախ: Ամենակարևորի մասին մեկ-երկու խոսք ենք ասում ու մի կողմ քաշվում: Կարծես՝ դա բացարձակ կարևոր չէր: Մեր խոսակցությունը ծնվեց այն ժամանակ, երբ տաք շոկոլադից երեքուկես կում էր մնացել:
Հինգուկես րոպե տևած խոսակցությունը կարող է փոխել ողջ օրվա տրամադրությունը, մտքերի հաջորդականությունը, գործողությունները:
Տաք շոկոլադի բաժակը ձեռքի թեթև շարժումներով սահեցնում եմ սեղանի վրայով: Մի զույգ անհանգիստ աչքեր հետևում են շարժումներիս ու փորձում հասկանալ՝ ինչ եմ մտածում.
-Ես գիտեմ՝ ինչ եմ անում,-ասում եմ ես, ու թեթև հազում:
Դժվար թե ինձ հասկանան. ինչպես կարելի է խաղի ընթացքը վայելելու համար ամեն ինչ մի վայրկյանում կորցնել: Այն էլ ՝ գիտակցաբար:
Գիտեք, ես վեց ամիս հետո կորցնելու եմ ամեն ինչ: Գիտեք, ես այդ մտքից հաճույք եմ ստանում: Որովհետև ես սովորել եմ ոչ թե սպասել մեր վարած խաղերի վերջին, այլ վայելել բուն ընթացքը: Խաղի մեջ կարևորն ընթացքն է: Ես վայելում եմ ամեն մի վայրկյանը՝ տաք շոկոլադի կումերի պես: Հետո տաք շոկոլադի բաժակը գնալու է աղբաման, կյանքս էլ՝ գրողի ծոցը: Այսինքն՝ էլի աղբաման:
Ես սիրում եմ խաղալ ու սիրում եմ խաղից հաճույք ստանալ: Ես էլ, դու էլ գիտենք, որ ես մեծ արագությամբ ընկնում եմ անդունդի մեջ: Ու ինձ կանգնեցնել անհնար է: Այսօր դու դրանում համոզվեցիր: Համոզվեցիր նաև, որ անիմաստ է ինձ փորձել ուշքի բերել, ստիպել մտածել ուղեղով: Երկուսս էլ գիտենք՝ իմ փոխարեն դու նույնը կանեիր:
Ռիսկ: Մեր կյանքի շարժիչը: Մենք դեռ օդում ենք զգում ռիսկի հոտն ու մեր մարդկային աչքերում գիշատիչ կենդանու փայլ է ծնվում: Այսօրվանից հետո հաստատ կասեմ՝ մենք ապրում ենք, որ գնանք ռիսկի, կորցնենք ամենն ու հետո վերագտնենք: Սա է մեր կյանքի իմաստը՝ հաղթել ու պարտվել: Խաղալ: Անընդհատ խաղի մեջ լինել ու առաջ շարժվել:
Մեր խոսակցությունից անցել են ժամեր: Ես չեմ ափսոսում: Ինչպես նաև չեմ ափսոսելու վեց ամիս հետո: Կամ ամեն ինչ, կամ ոչինչ: Մենք միշտ շարժվել ենք այս օրինաչափությամբ ու չենք պատրաստվում ոչինչ փոխել:
Ես էլի կպատրաստեմ տաք շոկոլադ ու կկործանվեմ՝ հպարտ, գլուխս բարձր ու ժպտալով: Իմ կործանումը կլինի ամենաօրիգինալը բոլոր կործանումներից, որովհետև դեռ ոչ մեկի մտքով չէր անցել կործանվել՝ տաք շոկոլադ խմելով:
Ես դեռ կարողանում եմ կատակե՞լ: Հավատա, ես գիտակցում եմ ամբողջ լրջությունը: Ես պատրաստ եմ: Մնաց սպասել վեց ամիս ու ժպտալով կործանվել:
Սա ամենահրաշալի խաղն է: Ու նման խաղի համար արժե կործանվել: Մի զույգ սև աչքեր, լսո՞ւմ ես ինձ: Ես անդունդի մեջ եմ ընկնում: Բայց կյանքում առաջին անգամ կործանվելն ինձ հաճույք է պատճառում:
-Դու կորցնելու ես կյանքը, իմաստը…
-Կարճ ասած՝ կյանքիս իմաստին:
