Ողջույն, իմ սիրելիներ: Արդեն հասցրել եմ նկատել, թե որքան նորաձև և ճաշակով են FashionYan-ի ընթերցողները, այդուհանդերձ, չեմ զլանա քեզ ներկայացնել մի քանի «չի կարելիներ», որոնք պետք է իմանա յուրաքանչյուր նորաձև աղջիկ: Եվ այսպես` ինչը ինչի հետ համադրել կամ չհամադրել, պարզի’ր հենց հիմա:
Ոսկեգույն+արծաթագույն: Մետաղական այս երկու գույների համադրումը աններելի է ոչ միայն հագուստի, այլև դիմահարդարման և աքսեսուարների դեպքում: Օրինակ, եթե պայուսակդ ոսկեգույն շղթայով է, ապա ցանկալի է, որ զարդերը նույնպես լինեն ոսկեգույն երանգի:
Կենդանական նախշեր: Մեր մեջ ասած` «ծիգրովկան», «զեբրը» և այլ կենդանիների նախշերով հագուստը ոչ միայն չափի մեջ է գեղեցիկ, այլև երբ ներկայացված է առանձին: Ոչ մի դեպքում չի կարելի իրար խառնել տարբեր կենդանիների նախշերով կտորները, զարդերը և այլ աքսեսուարներ: Ցանկալի չէ նաև, որ կենդանական նախշով հագուստ կրես ոտքից մինչև գլուխ 
Օրինակ, եթե «ծիգրովկա» զգեստ ես հագել, ապա պետք չէ այն համադրել նույն նախշով պայուսակի և կոշիկների հետ 
Ամառային+ձմեռային: Գիտեմ, որ մեր հանրապետությունում եղանակը խաբուսիկ է, և հաճախ առավոտյան բաց կոշիկներով դուրս գալիս երեկոյան արդեն կարող ենք մի լավ թրջել մեր ոտքերը: Բայց նույնիսկ այդ պարագայում ոչ մի դեպքում բաց կոշիկների` բոկոտիկների հետ մուգ գույնի զուգագուլպա կամ հաստ գուլպա մի կրիր: Էլ չեմ խոսում այն մասին, որ նման կոշիկների հետ վերարկու կամ բաճկոն են կրում: Մի խոսքով` չենք համադրում ամառային և ձմեռային հագուստը:
Ներքնազգեստ: Մի ժամանակ այդքան էլ խորհուրդ չէր տրվում բաց գույնի հագուստի տակից մուգ գույնի ներքնազգեստ հագնել: Ավելին` դա համարվում էր վուլգար երևույթ: Սակայն մեր օրերում այդքան էլ չի քննադատվում այդ երևույթը: Այնուամենայնիվ, ուշադիր եղիր ներքնազգեստիդ ձևի և գույնի հարցում: Եվս մեկ բան` ոչ մի դեպքում անթև երեկոյան զգեստի հետ կրծկալի «թևիկներ» մի կրիր, անգամ` թափանցիկ: Հավատա` դա փչացնում է փխրուն ու նուրբ կնոջ կերպարը:
